हिंगोली (Hingoli Dussehra Festival) : येथील सार्वजनिक दसरा महोत्सवाच्या आयोजनाची पूर्वतयारी जोमात सुरू झाली असून यावर्षी ऐतिहासिक दसरा महोत्सव १७२ व्या वर्षात पदार्पण करत आहे. अनंत चतुर्दशीच्या दिवशी बांसापूजन मोठ्या उत्साहात संपन्न झाले. रामलीला मैदानावरील दसरा कार्यालयात श्री हनुमानजींच्या मूर्ती, हत्ती, घोडे आदींचे नूतनीकरण करण्यात येत आहे. वेळूच्या बांबूपासून कमड्याद्वारे विविध पुतळे तयार करण्याचे काम सुरू असून रावणाच्या मुखवट्याचे काम मूर्तिकार बाबुलाल बमरुले, दीपक बमरुले व सहकाऱ्यांमार्फत सुरू आहे. यावेळी भास्कर इंगोले, मधुकर खंडागळे, दौलत बनसोडे, विश्वास नायक, गणेश साहू, गणेश धाबे आदी उपस्थित होते.
कृषी व औद्योगिक प्रदर्शनीचे स्टॉल उभारणीचे काम सुरू असून आकाश पाळणे, झुले क्रेनच्या सहाय्याने उभारले जात आहेत. मैदानाच्या पश्चिम भागात बच्चे कंपनीसाठी चक्री व लहान पाळणे सुरू झाल्याने महिला व नागरिकांची वर्दळ वाढली आहे. दुष्काळाच्या पार्श्वभूमीवर दसरा महोत्सवामुळे मनोरंजन व घरगुती साहित्य माफक दरात मिळेल, अशी अपेक्षा व्यक्त होत आहे. यावर्षी (Hingoli Dussehra Festival) दसरा महोत्सव शासनामार्फत दसरा महोत्सव समिती, विश्वस्त मंडळ व इतर समित्यांमार्फत साजरा करण्यात येणार आहे.
