हिरोशिमा विद्यापीठात सहा महिन्यांच्या प्रशिक्षणासाठी निवड; पुढील आठवड्यात पार्थिव महाराष्ट्रात आणणार
हिंगोलीतील 25 वर्षीय तरुण विद्यार्थ्याचा जपानमध्ये पोहताना दुर्दैवी मृत्यू झाल्याची घटना समोर आली आहे. श्याम संतोष अग्रवाल असे मृत विद्यार्थ्याचे नाव आहे. त्याच्या निधनाची माहिती कुटुंबीयांना संदेशाद्वारे मिळाली. या घटनेने अग्रवाल कुटुंबावर दुःखाचा डोंगर कोसळला असून हिंगोली जिल्ह्यातही हळहळ व्यक्त होत आहे.
श्याम हा IIT खरगपूरमध्ये ‘मास्टर ऑफ आर्किटेक्चर’चे शिक्षण घेत होता. ‘IIT एक्सचेंज’ कार्यक्रमाअंतर्गत महाविद्यालयाकडून सहा महिन्यांच्या प्रशिक्षणासाठी त्याची निवड झाली होती. या प्रशिक्षणासाठी तो गेल्याच महिन्यात जपानमधील हिरोशिमा विद्यापीठात दाखल झाला होता.
दरम्यान, जपानमधील कुरे शहरात असलेल्या ‘कारुगा बीच पार्क’ येथील स्विमिंग पूलमध्ये श्याम पोहण्यासाठी गेला होता. पोहण्यासाठी पाण्यात उतरल्यानंतर बराच वेळ उलटूनही तो बाहेर न आल्याने जीवरक्षकांनी त्याचा शोध घेतला. त्यावेळी श्यामचा मृतदेह पाण्यावर तरंगताना आढळून आला.
पुढील आठवड्यात पार्थिव महाराष्ट्रात आणणार
श्यामचे पार्थिव मायदेशी आणण्यासाठी भारत सरकारकडून प्रयत्न सुरू आहेत. उपलब्ध माहितीनुसार, पुढील आठवड्याभरात त्याचे पार्थिव छत्रपती संभाजीनगर येथे आणले जाणार आहे. त्यानंतर छत्रपती संभाजीनगर येथेच त्याच्यावर अंत्यसंस्कार करण्यात येणार आहेत.
