जिंतूरात जुन्या वादातून छाटला युवकाचा हाताचा मनगट

धारदार शस्त्राने भरदिवसा हल्ला; गंभीर जखमी युवक जिल्हा रुग्णालयात, आरोपी पसार

परभणी (Jintur Youth Attack) : जिंतूर शहरातील छत्रपती शिवाजी महाराज पुतळा परिसरातील दारू दुकानाजवळ रविवारी (दि.१८) दुपारी चारच्या सुमारास जुन्या वादातून एका युवकावर धारदार शस्त्राने जीवघेणा हल्ला करण्यात आला. या हल्ल्यात युवकाचा डावा हात मनगटाजवळून छाटला गेल्याने शहरात एकच खळबळ उडाली आहे. गंभीर जखमी अवस्थेत युवकाला प्रथम ग्रामीण रुग्णालयात व नंतर पुढील उपचारासाठी जिल्हा रुग्णालयात हलविण्यात आले.

मिळालेल्या माहितीनुसार, सोहेल नसीर पठाण (वय २५, रा. मरवा मस्जिद परिसर, जिंतूर) हा रविवारी दुपारी छत्रपती शिवाजी महाराज पुतळा परिसरातील एका दारू दुकानाच्या मैदानात असताना जुन्या वादाच्या कारणावरून आरोपी युवकाने त्याच्यावर अचानक धारदार शस्त्राने हल्ला केला. या (Jintur Youth Attack) हल्ल्यात सोहेलच्या डाव्या हाताचे मनगट जवळपास छाटले गेले. गंभीर जखमेमुळे मोठ्या प्रमाणात रक्तस्राव झाला. हल्ल्यानंतर आरोपी घटनास्थळावरून फरार झाला.

घटनेची माहिती मिळताच सामाजिक कार्यकर्ते नागेश आकात यांनी तत्काळ घटनास्थळी धाव घेत जखमी युवकाला ग्रामीण रुग्णालयात दाखल केले. तेथे वैद्यकीय अधिकारी डॉ. वाघ यांनी प्राथमिक उपचार करून पुढील उपचारासाठी जिल्हा रुग्णालयात रेफर केले. दरम्यान, घटनेची माहिती मिळताच पोलीस निरीक्षक गजेंद्र सरोदे, बिट जमादार महेश गजभारे तसेच परभणी गोपनीय शाखेचे पोलिस हवालदार जिया खान पठाण यांनी रुग्णालयात भेट देत प्राथमिक चौकशी केली. उशिरापर्यंत या प्रकरणी जिंतूर पोलिस ठाण्यात गुन्हा दाखल करण्याची प्रक्रिया सुरू होती. भरदिवसा घडलेल्या या थरारक घटनेमुळे जिंतूर शहरात भीतीचे वातावरण निर्माण झाले आहे.

आरोपीच्या शोधासाठी विशेष पथके रवाना

घटनेनंतर फरार झालेल्या आरोपीच्या शोधासाठी पोलीस निरीक्षक गजेंद्र सरोदे यांच्या मार्गदर्शनाखाली जिंतूर पोलिसांची विशेष पथके रवाना करण्यात आल्याची माहिती सूत्रांनी दिली.