कळमनुरी (Kalamanuri Police) : हजरत सरकार नुरुद्दीन नुरी शहीद दर्गा येथे दरवर्षीप्रमाणे यावर्षीही हजरत सरकार नुरुद्दीन नुरी शहीद (र.अ.) यांचा उरुस सोहळा 7 जुलैपासून सुरू होत आहे. या उरुसामध्ये सर्व धर्मीय भाविक मोठ्या संख्येने सहभागी होत असून राज्यासह देशातील विविध भागांतून भाविक कळमनुरी येथे दाखल होतात. उरुस काळात कोणताही अनुचित प्रकार घडू नये तसेच शहरात शांतता व सुव्यवस्था कायम राहावी, यासाठी शहरातील उलेमा, दर्ग्याचे मुतवल्ली तसेच पोलीस प्रशासनाची संयुक्त बैठक आयोजित करण्यात आली होती.
उरुस सोहळा शांततापूर्ण व आनंदमय वातावरणात पार पडावा, यासाठी 7 जुलैपासून शहरातील महत्त्वाच्या ठिकाणी मोठा पोलीस बंदोबस्त तैनात करण्यात येणार असून संवेदनशील भागात सीसीटीव्ही कॅमेऱ्यांचीही व्यवस्था करण्यात येणार आहे.
तसेच समाजकंटक व शांतता भंग करण्याचा प्रयत्न करणाऱ्या व्यक्तींवर पोलीस प्रशासनाची करडी नजर राहणार असून अशा व्यक्तींविरुद्ध कठोर कारवाई करण्यात येईल, असा इशारा पोलीस निरीक्षक जमीर नाईक यांनी दिला. यावेळी उपस्थित सर्व उलेमा, दर्गा व्यवस्थापन समितीचे पदाधिकारी व शहरातील मान्यवरांनी उरुस सोहळा शांततेत व बंधुभावाच्या वातावरणात पार पाडण्यासाठी सहकार्य करण्याचे आवाहन केले.
