अंतरवाली सराटीतील बैठकीनंतर मार्ग आणि मुक्कामाचे ठिकाण निश्चित; पाचव्या दिवशी सकाळी १० वाजता मुंबईत उपोषण सुरू करण्याचे आवाहन
अंतरवाली सराटी : मराठा आरक्षणाच्या मागणीसाठी उपोषण करणारे मनोज जरांगे पाटील यांनी मुंबईतील आंदोलनाबाबत मोठी घोषणा केली आहे. उपोषणाच्या १५व्या दिवशी त्यांनी मुंबईला जाण्याचा निर्णय अंतिम झाल्याचे स्पष्ट केले. अंतरवाली सराटी येथे झालेल्या महत्त्वपूर्ण बैठकीत मुंबईकडे जाण्याचा मार्ग, प्रवासादरम्यानचे मुक्काम आणि आझाद मैदानापर्यंत पोहोचण्याच्या नियोजनावर चर्चा करण्यात आली.
बैठकीनंतर जरांगे पाटील यांनी मराठा बांधवांशी संवाद साधत आंदोलनात सहभागी होण्याचे आवाहन केले. मुंबईतील आझाद मैदानावर होणारे उपोषण बेमुदत असेल, अशी घोषणा त्यांनी केली.
मुंबईकडे जाण्यासाठी चार टप्प्यांमध्ये मुक्काम निश्चित करण्यात आला आहे. पहिला मुक्काम बीड जिल्ह्यातील पाटोदा येथे, दुसरा अहिल्यानगर जिल्ह्यातील श्रीगोंदा येथे, तिसरा पुण्यातील हडपसर येथे, तर चौथा रायगड जिल्ह्यातील खोपोली येथे असेल. त्यानंतर पाचव्या दिवशी मुंबईतील आझाद मैदानावर पोहोचून सकाळी १० वाजता उपोषण सुरू करण्यात येणार असल्याचे जरांगे पाटील यांनी सांगितले.
या आंदोलनासाठी मराठा समाजाने आतापासूनच तयारीला लागावे, असे आवाहन त्यांनी केले. मुक्कामाच्या ठिकाणी असलेल्या मराठा बांधवांनी नियोजनासाठी सक्रिय व्हावे, असेही त्यांनी सांगितले. मुंबईकडे जाणारे आंदोलक आपल्या मुलाबाळांच्या भविष्यासाठी लढा देत असल्याचे नमूद करत, जे मुंबईला येऊ शकणार नाहीत त्यांनी आंदोलनाच्या मार्गावर येऊन पाठिंबा आणि आशीर्वाद द्यावा, असे आवाहन त्यांनी केले.
जरांगे पाटील यांनी समाजासाठी एक दिवस देण्याचे आवाहन करत कामे बाजूला ठेवून आंदोलनात सहभागी होण्याचे आवाहन केले. मराठा समाजाच्या ताकदीचा उल्लेख करत त्यांनी आंदोलनाचा उद्देश कोणाला आव्हान देणे किंवा विरोधासाठी विरोध करणे नसून समाजाच्या हितासाठी लढा देणे असल्याचे स्पष्ट केले.
मुंबईकडे जाताना सर्वांनी एकाच मार्गाचा अवलंब करावा, असेही त्यांनी सांगितले. ज्या मराठा बांधवांकडे वाहने आहेत, मात्र त्यांना मुंबईपर्यंत आंदोलनात सहभागी होता येणार नाही, त्यांनी आंदोलकांना मुंबईपर्यंत सोडून पुन्हा परतावे, असे आवाहन करण्यात आले.
आंदोलनादरम्यान शांततेचा मार्ग कायम ठेवण्याचे आवाहन जरांगे पाटील यांनी केले. प्रवासात शिस्त पाळावी, वाहनांचे ओव्हरटेकिंग करू नये आणि दिलेला शब्द पाळावा, असे निर्देश त्यांनी मराठा बांधवांना दिले.
मुंबईतील आझाद मैदानावरील उपोषण बेमुदत राहणार असल्याचे पुन्हा स्पष्ट करत त्यांनी आंदोलकांनी सहकुटुंब सहभागी व्हावे आणि सर्वांनी एकत्रितपणे मुंबईकडे रवाना व्हावे, असे सांगितले. न्यायव्यवस्थेकडून अन्याय होणार नाही, असा विश्वास व्यक्त करत सरकारकडून अन्याय झाला तरी न्यायदेवता न्याय देईल, असेही त्यांनी म्हटले.
मुंबईकडे जाणाऱ्या प्रवासाला दोन ते तीन दिवस लागू शकतात, असेही जरांगे पाटील यांनी सांगितले. मराठा आंदोलकांनी दिलेल्या होकारानंतर मुंबईला जाण्याचा निर्णय घेण्यात आल्याचे त्यांनी स्पष्ट केले.
