२४ हजार २४९ मते मिळवत वेधले लक्ष; कोहळे-वांजारींच्या लढतीत दुसऱ्या पसंतीच्या मतांची चर्चा
वर्धा : नागपूर विभाग पदवीधर मतदारसंघाच्या विधान परिषद निवडणुकीत नितेश बालकृष्णाजी कराळे गुरुजी यांनी २४ हजार २४९ मते मिळवत राजकीय वर्तुळाचे लक्ष वेधून घेतले आहे. भाजपचे सुधाकर विठ्ठलराव कोहळे यांना ६० हजार ९२४, तर काँग्रेसचे अभिजित गोविंदराव वंजारी यांना ५६ हजार ६३० मते मिळाली आहेत. दोन्ही प्रमुख उमेदवारांमध्ये केवळ ४ हजार २९४ मतांचे अंतर असल्याने कराळे गुरुजींच्या मतांची चर्चा सुरू झाली आहे. त्यामुळे कराळे मास्तर किंगमेकर ठरणार का, असा प्रश्न उपस्थित होत आहे.
या निवडणुकीत पहिल्या फेरीत काँग्रेसचे अभिजित वंजारी आघाडीवर होते. मात्र, दुसऱ्या फेरीत भाजपचे सुधाकर कोहळे यांनी आघाडी घेतली. त्यामुळे दोन्ही उमेदवारांमधील चुरस वाढली आहे.
निवडणुकीच्या आदल्या दिवशी कराळे गुरुजी यांना राष्ट्रवादी काँग्रेस पक्षातून निष्कासित करण्याचा आदेश आल्याची चर्चा होती. मात्र, त्यानंतरही त्यांनी २४ हजारांहून अधिक मते मिळवत आपली स्वतंत्र राजकीय ताकद दाखवून दिली.
दुसऱ्या पसंतीच्या मतांकडे लक्ष
कोहळे आणि वंजारी यांच्यातील मतांचे अंतर कमी असताना कराळे यांना मिळालेल्या मतांची संख्या लक्षणीय आहे. त्यामुळे दुसऱ्या पसंतीची मते कोणाच्या बाजूने जातात, याला महत्त्व प्राप्त झाले आहे.
राजकीय जाणकारांच्या मते, कराळे यांना प्रथम पसंती दिलेल्या मतदारांची दुसऱ्या पसंतीची मते अभिजित वंजारी यांच्या बाजूने जाऊ शकतात. मात्र, प्रत्यक्ष मतांचे हस्तांतरण आणि अधिकृत मतमोजणीच्या प्रक्रियेनंतरच याबाबतचे चित्र स्पष्ट होईल.
२४ हजार २४९ मतांच्या जोरावर कराळे गुरुजींनी या निवडणुकीत आपली स्वतंत्र छाप पाडली आहे. आता दुसऱ्या पसंतीच्या मतांच्या गणितात त्यांची भूमिका किती महत्त्वाची ठरते, याकडे राजकीय वर्तुळाचे लक्ष लागले आहे.
