परभणीत शेतात सोडलेल्या विद्युत प्रवाहाचा धक्का; पती- पत्नीचा मृत्यू

पालम तालुक्यातील गुळखंड येथील घटना मयत फरकंडा येथील रहिवासी

परभणी (Parbhani Husband-wife Death) : पालम  तालुक्यातील ऊसाच्या शेतात रानडुक्कर जावू नये म्हणून शेता भोवती बांधलेल्या तारांमध्ये विद्युत प्रवाह सोडण्यात आला. या विद्युत प्रवाहाचा जोरदार धक्का लागून पती - पत्नीचा मृत्यू झाला. ही घटना मंगळवार १४ जुलै रोजी सकाळी साडे नऊच्या सुमारास पालम तालुक्यातील गुळखंड येथे घडली. मयत पती- पत्नी फरकंडा येथील रहिवाशी आहेत. आशाबी महेबुब पठाण वय ३५ वर्ष, महेबुब मदारसाब पठाण वय ४० वर्ष दोन्ही रा. फरकंडा ता. पालम, असे मयतांची नावे आहेत.

याबाबत मयताचे वडिल मदारसाब नन्हुसाब पठाण यांनी पालम पोलिसात तक्रार दिली आहे. या घटनेबाबत अधिक माहिती अशी की, शेतातील ऊस पिकाचे रानडुक्करापासून संरक्षण करण्यासाठी शेताच्या भोवताली तारा लावून विद्युत प्रवाह सोडण्यात आला होता. हा प्रवाह वेळेवर बंद न केल्याने आशाबी पठाण यांचा तारेला स्पर्श झाला आणि विजेचा धक्का बसला. पत्नीला वाचविण्यासाठी धाव घेतलेले महेबुब पठाण यांनाही विजेचा जोरदार धक्का लागला. यामध्ये पती- पत्नी दोघांचाही मृत्यू झाला. पत्नी आणि स्वत:च्या मृत्युस कारणीभूत ठरल्या प्रकरणी महेबुब मदारसाब पठाण यांच्यावर पालम पोलिसात गुन्हा नोंदविण्यात आला आहे. तपास पोउपनि. लोखंडे करत आहेत.