भेगात दुचाकीचे चाक अडकून अनियंत्रीत दुचाकी आदळली दुभाजकावर...!
परभणी (Gangakhed Youth Death) : गंगाखेड शहरात रस्त्यामध्ये पडलेल्या भेगात दुचाकीचे चाक गेल्याने वाहन अनियंत्रीत होऊन दुभाजकावर आदळले. यामध्ये २८ वर्षीय तरुणाचा मृत्यू झाला. ही घटना गंगाखेड शहरातील परभणी रस्त्यावर बुधवार ८ जुलै रोजी रात्री साडे दहाच्या सुमारास घडली. या प्रकरणी गुरुवारी रात्री उशीरा गंगाखेड पोलिसात गुन्हा दाखल करण्यात आला आहे.गंगाखेड ते परभणी जाणार्‍या सिमेंट रस्त्यावर जागोजागी भेगा पडल्या आहेत. या भेगा जीवघेण्या ठरत आहेत.
बुधवारी रात्री झालेल्या अपघातात शेख अनिस शेख कालू वय २८ वर्ष, रा. महातपूरी या तरुणाचा मृत्यू झाला. गंगाखेड येथे कामानिमित्त आलेला शेख अनिस हा तरुण मित्र शेख रशीद शेख नवाज याच्या सोबत दुचाका rवरुन महातपूरी गावाकडे जात असताना परळी नाक्या पासून जवळच परभणी रस्त्या वरील पेट्रोलपंप समोर अपघात झाला. दुचाकीचे चाक रस्त्याच्या भेगात अडकल्याने वाहन अनियंत्रीत झाले. त्यानंतर दुचाकी दुभाजकावर आदळली. जखमींना गंगाखेड उपजिल्हा रुग्णालयात दाखल करण्यात आले.
शेख अनिस याला पुढील उपचारासाठी परभणीला पाठविण्यात आले. गुरुवार ९ जुलै रोजी सकाळच्या सुमारास शेख अनिसचा मृत्यू झाला. या प्रकरणी मयताचा भाऊ शेख युनूस यांच्या फिर्यादीवरुन दुचाकी चालक शेख रशीद शेख नवाज याच्यावर (Gangakhed Youth Death) अपघाती मृत्युस कारणीभूत ठरल्या प्रकरणी गुन्हा नोंदविण्यात आला आहे. रस्त्यावरील भेगा जीवघेण्या ठरत असून निष्पाप वाहन चालकांना आपला जीव गमवावा लागत आहे.
