सायनच्या दिशेने जाताना दुर्घटना; आमदार प्रवीण दरेकर सुरक्षित, पोलिसांकडून तपास सुरू
मुंबईतील ईस्टर्न फ्री वेवर भाजपचे विधान परिषदेचे आमदार प्रवीण दरेकर यांच्या ताफ्यातील एका वाहनाचा अपघात झाला. सायनच्या दिशेने जात असताना ताफ्यातील गाडीने एका टॅक्सी आणि दोन कारला धडक दिल्याची प्राथमिक माहिती आहे. या घटनेत दरेकर यांना कोणतीही दुखापत झाली नसून ते सुरक्षित असल्याची माहिती समोर आली आहे.
प्राथमिक माहितीनुसार, प्रवीण दरेकर यांचा ताफा ईस्टर्न फ्री वेवरून सायनकडे जात होता. त्यावेळी ताफ्यातील वाहन चालकाचा गाडीवरील ताबा सुटला किंवा अचानक समोर आलेल्या वाहनामुळे धडक झाली असावी, असा प्राथमिक संशय व्यक्त केला जात आहे. या धडकेत ताफ्यातील वाहनाने टॅक्सी आणि दोन कारला धडक दिली. अपघातामुळे संबंधित वाहनांचे काही प्रमाणात नुकसान झाले.
अपघातानंतर फ्री वेवर वाहतूक कोंडी
दुर्घटनेनंतर ईस्टर्न फ्री वेवर काही काळ वाहतुकीचा खोळंबा झाला. अपघाताची माहिती मिळताच स्थानिक पोलीस घटनास्थळी पोहोचले. पोलिसांनी अपघातग्रस्त वाहने बाजूला केल्यानंतर वाहतूक पुन्हा सुरळीत करण्यात आली.
अपघाताचे नेमके कारण शोधण्याचे काम सुरू
दरम्यान, अपघातामागील नेमके कारण अद्याप स्पष्ट झालेले नाही. वाहनावरील चालकाचा ताबा का सुटला, समोर अचानक वाहन आल्यामुळे धडक झाली की अन्य कोणता तांत्रिक बिघाड झाला, याचा तपास पोलीस करत आहेत. या दुर्घटनेत आमदार प्रवीण दरेकर सुरक्षित असल्याची माहिती आहे.
