तरोडा नाका परिसरातील घटना; २६ वर्षीय प्रतीक चौथरेने ५० वर्षीय आईवर केला हल्ला, पोलिसांकडून तपास सुरू
नांदेड : शहरातील तरोडा नाका परिसरातील राहुल कॉलनी येथे रविवारी रात्री घडलेल्या दुर्दैवी घटनेने परिसर हादरला आहे. २६ वर्षीय प्रतीक चौथरे याने आपल्या ५० वर्षीय आईवर घरातच हल्ला केल्यानंतर दुसऱ्या खोलीत जाऊन आत्महत्या केल्याची माहिती समोर आली आहे. या घटनेमुळे परिसरात मोठी खळबळ उडाली असून, या कृत्यामागील नेमके कारण अद्याप स्पष्ट झालेले नाही.
मिळालेल्या माहितीनुसार, राहुल कॉलनीत चौथरे कुटुंब राहते. रात्री सुमारे ११ वाजण्याच्या सुमारास प्रतीकने आईवर घरातच हल्ला केला. या हल्ल्यात त्या गंभीर जखमी झाल्या. त्यानंतर प्रतीक दुसऱ्या खोलीत गेला आणि तेथे त्याने आत्महत्येचे पाऊल उचलले.
दरम्यान, घरातून संशयास्पद आवाज ऐकू आल्याने शेजाऱ्यांना घरात काहीतरी अनुचित घडल्याचा संशय आला. त्यांनी परिस्थिती जाणून घेण्याचा प्रयत्न केल्यानंतर हा प्रकार उघडकीस आला. माहिती मिळताच पोलिसांनी घटनास्थळी धाव घेतली. पोलिसांनी दोन्ही मृतदेह ताब्यात घेत पुढील कायदेशीर प्रक्रिया सुरू केली आहे.
प्रतीकचे वडील नोकरीच्या कारणास्तव बाहेरगावी असतात. ते घरी नसतानाच ही घटना घडल्याचे समोर आले आहे.
आईवर हल्ला केल्यानंतर प्रतीकने आत्महत्या का केली, याचे कारण अद्याप समोर आलेले नाही. पोलिसांकडून घटनेच्या विविध पैलूंचा तपास केला जात असून, घटनास्थळावरील परिस्थिती आणि उपलब्ध पुराव्यांच्या आधारे या दुर्दैवी घटनेमागील कारणाचा शोध घेतला जात आहे. तपास पूर्ण झाल्यानंतरच घटनेचे नेमके कारण स्पष्ट होणार आहे.
