अकोला (Ramdaspeth Murder Case) : रामदासपेठ पोलिस ठाण्याच्या हद्दीतील अलंकार मार्केट परिसरात घडलेल्या खून प्रकरणाचा स्थानिक गुन्हे शाखेने अवघ्या काही दिवसांत छडा लावत चार आरोपींना ताब्यात घेतले आहे. प्रेमविवाहातून निर्माण झालेल्या वादातून हा खून झाल्याचे तपासात निष्पन्न झाले आहे.
मृतक राहुल कालू सारसर याने आरोपींच्या भाचीसोबत प्रेमविवाह केला होता. याच कारणावरून आरोपींनी कटकारस्थान रचून गैरकायद्याची मंडळी तयार केली. त्यानंतर १५ मे २०२६ रोजी राज मंदिर बारच्या गल्लीमध्ये राहुल याच्यावर पाईप व धारदार शस्त्रांनी हल्ला करून गंभीर जखमी केले. उपचारादरम्यान त्याचा मृत्यू झाला.
या प्रकरणी फिर्यादीच्या तक्रारीवरून रामदासपेठ पोलीस ठाण्यात अप क्रमांक ३७८/२०२६ अन्वये भारतीय न्याय संहितेच्या कलम १८९(२), १९०, १९१(२), १९१(३), ६१(२), १०३(२), ३५१(२)(३) अंतर्गत गुन्हा दाखल करण्यात आला.
घटनेची गंभीरता लक्षात घेता पोलीस अधीक्षक अर्चित चांडक यांनी आरोपींना तात्काळ अटक करण्याचे आदेश दिले. त्यानुसार स्थानिक गुन्हे शाखेचे पोलीस निरीक्षक शंकर शेळके यांच्या मार्गदर्शनाखाली विविध पथके तयार करण्यात आली.
तपासादरम्यान आरोपी बादशहा सरू पारोचे (वय ३५, रा. वरणगाव, ता. भुसावळ, जि. जळगाव) हा फरार होण्याच्या तयारीत असल्याची माहिती मिळाल्यानंतर त्याला १६ मे रोजी ताब्यात घेण्यात आले. त्यानंतर न्यायालयात हजर केले असता आरोपीला २० मेपर्यंत पोलीस कोठडी सुनावण्यात आली.
दरम्यान, उर्वरित आरोपींचा शोध घेण्यासाठी स्थानिक गुन्हे शाखेच्या पथकाने तांत्रिक विश्लेषण व गुप्त बातमीदारांच्या मदतीने तपास सुरू ठेवला. आरोपी भुसावळ परिसरात असल्याची माहिती मिळताच पोलिसांनी तत्काळ कारवाई करत जळगाव-भुसावळ हायवेवर सापळा रचला.
या कारवाईत संतोष रामचरण पारोचे (वय २४, रा. विजय नगर, तारफैल, अकोला), गौरव राहुल करोसिया (वय १८) आणि हारीश उर्फ हर्षउ राहुल करोसिया (वय २०, दोघे रा. आंबेडकर नगर, वरणगाव, जि. जळगाव) यांना ताब्यात घेण्यात आले.
सदर कारवाई पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी यांच्या मार्गदर्शनाखाली पोलीस निरीक्षक शंकर शेळके, सपोनि विजय जाधव, पोउपनि गोपाल जाधव, विष्णू बोडखे, माजीद पठाण तसेच स्थानिक गुन्हे शाखेच्या पथकाने केली.
