रिक्त नायब तहसीलदार पदे तातडीने भरण्याची महसूलमंत्री चंद्रशेखर बावनकुळे यांच्याकडे मागणी
बुलढाणा (Revenue Department) : चिखली विधानसभा मतदारसंघाच्या आमदार सौ. श्वेता महाले पाटील यांनी चिखली तहसील कार्यालयातील नायब तहसीलदार संवर्गातील रिक्त पदांमुळे नागरिकांना होत असलेल्या गैरसोयीची दखल घेत राज्याचे महसूलमंत्री मा. चंद्रशेखर बावनकुळे यांना निवेदन सादर करून ही पदे तातडीने भरण्याची मागणी केली आहे.
चिखली तालुका हा बुलढाणा जिल्ह्यातील भौगोलिकदृष्ट्या विस्तीर्ण आणि महसुली कामकाजाच्या दृष्टीने महत्त्वाचा तालुका आहे. तालुक्यात ११ मंडळे आणि ६३ तलाठी सज्जा असलेल्या गावांचा समावेश असून विविध महसुली तसेच शासकीय सेवांसाठी दररोज मोठ्या संख्येने नागरिक आणि शेतकरी तहसील कार्यालयात येत असतात.
सध्या तहसील कार्यालयातील मंजूर चार नायब तहसीलदार पदांपैकी दोन पदे रिक्त आहेत. त्यापैकी निवासी नायब तहसीलदार पद ३१ मे २०२६ पासून, तर एक नायब तहसीलदार पद ३० मे २०२५ पासून रिक्त आहे. त्यामुळे उर्वरित अधिकाऱ्यांवर अतिरिक्त कामाचा ताण निर्माण झाला असून महसुली आणि प्रशासकीय कामकाजावर त्याचा परिणाम होत असल्याचे आमदार महाले यांनी निवेदनात नमूद केले आहे.
याशिवाय श्रावणबाळ सेवा राज्य निवृत्ती वेतन योजना, संजय गांधी निराधार योजना, दिव्यांग कल्याणाशी संबंधित प्रकरणे तसेच आगामी स्थानिक स्वराज्य संस्थांच्या निवडणुका आणि मतदार यादी विशेष पुनरीक्षण कार्यक्रमामुळे तहसील कार्यालयावरील कामकाजाचा भार आणखी वाढणार असल्याचेही त्यांनी नमूद केले आहे.
नागरिकांना वेळेत आणि दर्जेदार सेवा उपलब्ध व्हावी तसेच प्रशासन अधिक सक्षम आणि कार्यक्षम राहावे, यासाठी चिखली तहसील कार्यालयातील रिक्त नायब तहसीलदार पदे तातडीने भरण्याचे निर्देश संबंधित विभागाला देण्यात यावेत, अशी मागणी आमदार श्वेता महाले पाटील यांनी महसूलमंत्री चंद्रशेखर बावनकुळे यांच्याकडे केली आहे.
