किन्होळा-खरवडे शिवारातील घटना; जखमी मानवत शहरातील रहिवासी
परभणी : परभणी-पाथरी राष्ट्रीय महामार्ग क्रमांक ६१ वरील किन्होळा-खरवडे शिवारात ट्रक आणि स्कॉर्पिओची समोरासमोर धडक होऊन पाच तरुण जखमी झाल्याची घटना शुक्रवार, ७ ऑगस्ट रोजी रात्री साडेआठच्या सुमारास घडली. जखमींना उपचारासाठी परभणी येथील एका खाजगी रुग्णालयात दाखल करण्यात आले असून, त्यांची प्रकृती स्थिर असल्याची माहिती आहे.
मिळालेल्या माहितीनुसार, मानवत येथील पाच तरुण स्कॉर्पिओ क्र. एमएच २३ बीएच ४७४७ मधून मानवतकडे जात होते. याचवेळी मानवतकडून परभणीकडे जाणाऱ्या ट्रक क्र. एमएच ३८ एक्स ५३६९ सोबत स्कॉर्पिओची धडक झाली.
या अपघातात स्कॉर्पिओच्या समोरील भागाचे मोठ्या प्रमाणात नुकसान झाले. या अपघातात मानवत शहरातील महेबूब मन्सुरी, वसीम कुरेशी, अक्रम कुरेशी, सय्यद महेफुज आणि शेख अदनान हे पाच जण जखमी झाले आहेत. त्यांच्यावर परभणी येथील खाजगी रुग्णालयात उपचार सुरू आहेत.
दरम्यान, किन्होळा-खरवडे शिवारातील महामार्गावर मोठा खड्डा पडलेला असून, या खड्ड्यामुळेच अपघात झाल्याची प्राथमिक माहिती समोर येत आहे. महामार्गावरील खड्ड्यांमुळे अपघाताचा धोका वाढला असून, संबंधित यंत्रणेने तातडीने रस्त्याची दुरुस्ती करावी, अशी मागणी होत आहे.
