सेनगावात घरफोडी; साडेतीन लाखांचा ऐवज व रोकड पळविली...

हिंगोली (Sengaon Burglary) : सेनगाव शहरातील इंदिरा नगर भागात घरफोडीची घटना घडली. ज्यामध्ये सोन्या चांदीचा ऐवज रोकड व मोबाईल असा एकुण ३ लाख ४० हजार रुपयाचा मुद्देमाल चोरून नेल्याने सेनगाव पोलिस ठाण्यात गुन्हा दाखल करण्यात आला. 

याबाबत पोलिस सुत्रांनी दिलेली माहिती अशी की, सेनगाव शहरातील इंदिरा नगर भागात दिपसिंग छोटूसिंग सुरकेटाक यांचे निवासस्थान आहे. ३ ते ४ ऑगस्ट दरम्यानच्या कालावधीत कोणी तरी अज्ञात चोरट्याने दिपसिंग सुरकेटाक यांच्या घराचे कुलूप कोंडा तोडून घरात प्रवेश करून लोखंडी कपाटाचे कुलूप तोडून कपाटातील ३० हजार रुपये किमतीचा १ तोळ्याचा सोन्याचा नेक्लेस, १५ हजार रुपयाचे ५ ग्रॅमचे सोन्याचे सेवनपीस, १५ हजार रुपयाची ५ ग्रॅमची १ सोन्याची पोत, १५ हजार रुपयाचे १ सोन्याचे ७ ग्रॅमचे मंगळसूत्र, ३ हजार रुपयाचे १२ तोळ्याचे चांदीचे चैन, २ हजार रुपयाचे ३ तोळ्याच्या ६ चांदीच्या अंगठ्या ५ हजार रुपयाचे २ मोबाईल, नगदी २ लाख ५५ हजार रुपये असा एकुण ३ लाख ४० हजार रुपयाचा मुद्देमाल चोरून नेला. 

या प्रकरणी ४ ऑगस्ट रोजी सेनगाव पोलिस ठाण्यात दिपसिंग सुरकेटाक यांनी दिलेल्या फिर्यादीवरून अज्ञात आरोपीवर गुन्हा दाखल करण्यात आला. घटनास्थळी सहाय्यक पोलिस निरीक्षक संग्राम जाधव यांच्यासह पोलिस उपनिरीक्षक खंदारे, सुभाष चव्हाण व ठसे तज्ञांनी भेट दिली. गुन्ह्याच्या अनुषंगाने पोलिसांचे पथक रवाना करण्यात आले आहे. या प्रकरणाचा पुढील तपास पोलिस उपनिरीक्षक रविकिरण खंदारे हे करीत आहेत.