१५ व्या वित्त आयोगाच्या निधीतून कामे अपूर्ण; ग्रामपंचायतीला चौकशीचे आदेश!
मानोरा (Shendurjana hand pump) : १५ व्या वित्त आयोगाच्या सन २०२० - २०२१ च्या निधीतून मानोरा तालुक्यातील शेंदुरजना (आढाव ) येथे ७ नवीन विंधन विहीर हातपंप घेण्यासाठी ४ लाख ८७ हजार ४०८ रुपयांची प्रशासकीय मंजुरी देण्यात आली होती. मात्र त्यापैकी केवळ ५ हातपंप बसवण्यात आले असून, त्यातील ४ हातपंप सध्या बंद अवस्थेत आहेत. स्थानिक सामाजिक कार्यकर्ता रवि राठोड यांनी १४ एप्रिल २०२६ रोजी तक्रार केली होती. त्यानंतर ही चौकशी करून अहवाल संबंधितांनी सादर केला आहे.
जिल्हा परिषद यांत्रिकी उपविभाग यांनी दिलेल्या अहवालानुसार, शेंदुरजना (आढाव) येथे ७ पैकी ५ नवीन विंधन विहीर हातपंप बसवण्यात आले. एकूण ४ लाख १६ हजार ९९५ रुपये खर्च करण्यात आले असून उर्वरित ७०४१३ रुपये शासन खात्यात जमा आहेत. निधी अपुरा पडल्याने २ हातपंप बसवले गेलेच नाहीत. बसवलेल्या ५ पैकी ४ हातपंपांना पाणी लागत नसल्याने ते कार्यरत नाहीत. या कामासाठी कंत्राटदार म्हणून सरपंच - सचिव, ग्रामपंचायत शेंदुरजना (आढाव) हे होते. सदर काम शासकीय जागेत झाले आहे की नाही याची खात्री ग्रामपंचायतीने करावी, असे निर्देश यांत्रिकी उपविभागाने दिले आहेत.
