नागरिकांनी सोडला सुटकेचा निश्वास; गाय ताब्यात घेताना नगरपालिकेचा एक कर्मचारी जखमी
हिंगोली : शहरातील ग्रामीण पोलीस स्टेशन रोडवर पिसाळल्यासारखी वावरणाऱ्या गायीमुळे नागरिकांमध्ये भीतीचे वातावरण निर्माण झाले होते. ये-जा करणाऱ्या नागरिकांच्या अंगावर धावून जाण्याचा प्रकार घडत असल्याने या मार्गावरील नागरिकांमध्ये चिंता होती.
या गंभीर बाबीची माहिती १३ सप्टेंबर, रविवार रोजी प्रभागातील काही नागरिकांनी नगरसेविका सौ. सोनाली गोटरे आणि माजी नगरसेवक विशाल गोटरे यांना दिली. त्यानंतर त्यांनी तात्काळ नगरपरिषद प्रशासनाशी संपर्क साधून सदरील गायीचा बंदोबस्त करण्याची मागणी केली.
या माहितीची दखल घेत मुख्याधिकारी प्रांजली मुंडे यांनी तात्काळ कारवाईचे निर्देश दिले. त्यानुसार स्वच्छता निरीक्षक बाळू बांगर यांच्यासह नगरपरिषदेचे पथक घटनास्थळी रवाना झाले. पथकाने शर्थीचे प्रयत्न करत अखेर पिसाळलेल्या गायीला ताब्यात घेतले.
गाय ताब्यात घेत असताना नगरपरिषदेचे कर्मचारी दिनेश वर्मा यांना किरकोळ दुखापत झाली. अखेर गाय ताब्यात घेतल्याने ग्रामीण पोलीस स्टेशन रोडवरील नागरिकांनी सुटकेचा निश्वास सोडला. नगरपरिषद प्रशासनाने तात्काळ केलेल्या कारवाईबद्दल नागरिकांनी समाधान व्यक्त केले.
या मोहिमेत नगरपालिकेच्या स्वच्छता विभागातील दिनेश वर्मा, सुधाकर मोकाटे, काशिनाथ लग्गड, सतीश सोनवणे आणि नागेश चव्हाण यांनी सहभाग नोंदवला.
