जयस्तंभ चौक ते खामगाव चौफुली मार्गावरील वृक्षलागवडीची नगराध्यक्ष पंडितराव देशमुख यांनी केली पाहणी
चिखली : शहराच्या विकासाला आता पर्यावरण संवर्धनाचीही जोड देण्यात येत असून, ‘हरित चिखली, सुंदर चिखली, विकसित चिखली’ या संकल्पनेतून चिखली नगरपरिषदेने वृक्षलागवडीला गती दिली आहे. जयस्तंभ चौक ते खामगाव चौफुली या प्रमुख मार्गावर सुरू असलेल्या वृक्षलागवडीच्या कामाची नगराध्यक्ष पंडितराव देशमुख यांनी 16 सप्टेंबर 2026 रोजी प्रत्यक्ष पाहणी करून कामाचा आढावा घेतला.
चिखली विधानसभा मतदारसंघाच्या आमदार सौ. श्वेताताई महाले पाटील यांच्या मार्गदर्शनाखाली शहराच्या विकासकामांना गती देतानाच स्वच्छता, सौंदर्यीकरण आणि पर्यावरण संवर्धनाला प्राधान्य देण्यात येत आहे. त्याचाच एक भाग म्हणून शहरातील प्रमुख मार्गावर वृक्षलागवड करण्यात येत आहे.
पाहणीदरम्यान नगराध्यक्ष पंडितराव देशमुख यांनी वृक्षांची निवड, शास्त्रशुद्ध पद्धतीने लागवड तसेच लागवडीनंतरच्या संगोपनाबाबत संबंधित अधिकारी व कर्मचाऱ्यांकडून माहिती घेतली. लावलेली रोपे केवळ संख्या वाढविण्यापुरती मर्यादित न राहता त्यांचे योग्य संगोपन होणे आवश्यक आहे. प्रत्येक वृक्षाला नियमित पाणी, संरक्षण आणि आवश्यक देखभाल मिळावी, यासाठी त्यांनी संबंधितांना सूचना दिल्या.
‘आज लावलेले वृक्ष हे उद्याच्या चिखलीच्या हरित भविष्याची पायाभरणी आहेत,’ या भूमिकेतून नगरपरिषदेच्या माध्यमातून वृक्षलागवडीसोबतच त्यांच्या संवर्धनावरही विशेष लक्ष दिले जात आहे. शहराचा विकास करताना नागरिकांना स्वच्छ, सुंदर, हिरवेगार आणि आरोग्यदायी वातावरण मिळावे, यासाठी पर्यावरणपूरक उपक्रमांना सातत्याने चालना देण्याचा प्रयत्न असल्याचे यावेळी सांगण्यात आले.
चिखलीच्या विकासाची दिशा केवळ भौतिक सुविधांच्या निर्मितीपुरती मर्यादित न ठेवता शहराच्या सौंदर्यात आणि पर्यावरणीय गुणवत्तेतही भर घालण्याची असल्याचे नगराध्यक्ष पंडितराव देशमुख यांनी स्पष्ट केले. त्यामुळे विकासकामांसोबत शहरातील हिरवाई वाढविण्यावर भर देण्यात येत आहे.
यावेळी नगरसेवक सागर पुरोहित, सामाजिक कार्यकर्ते राम बनसोडे, भारतीय जनता पार्टीचे जिल्हा सचिव महेशभाऊ लोणकर, मुंढे साहेब, पाखरे साहेब यांच्यासह संबंधित अधिकारी व कर्मचारी उपस्थित होते.
