हिंगोली : जिल्ह्यातील तिन्ही विधानसभा मतदारसंघांत मध्यंतरी सखोल मतदार यादी पुनरीक्षण कार्यक्रम हाती घेण्यात आला होता. या अंतर्गत घरोघरी जाऊन मतदारांचे अर्ज भरून घेण्यात आले. यामध्ये अनेक मतदारांच्या नावांमध्ये विसंगती तसेच नातेवाईकांच्या नावांमध्ये जुळवणी झाली नसल्याचे आढळून आले. त्यामुळे निवडणूक विभागाने तब्बल ३५ हजार मतदारांना नोटीस बजावली आहे.
जिल्ह्यातील हिंगोली, वसमत आणि कळमनुरी विधानसभा मतदारसंघात बीएलओच्या माध्यमातून घरोघरी जाऊन मतदार यादीचा सखोल पुनरीक्षण कार्यक्रम राबविण्यात आला. गावपातळीवर मतदारांचे अर्ज भरून घेण्यात आले. यामध्ये प्रामुख्याने मतदारांचे सन २००२ च्या मतदार यादीतील माता-पिता तसेच आजी-आजोबा यांच्या नावाची जुळवणी करण्यात आली.
याच प्रक्रियेत कायमस्वरूपी स्थलांतरित झालेले, मॅपिंग न झालेले तसेच मृत झालेले असे जवळपास ८५ हजार मतदार आढळून आले. यासंदर्भात जिल्हाधिकारी कार्यालयात अधिकारी व कर्मचाऱ्यांची बैठक घेऊन आढावा घेण्यात आला.
दरम्यान, अनेक मतदारांच्या नावासह वडिलांच्या नावात विसंगती आढळून आली आहे. त्यामुळे अशा १८ हजार मतदारांच्या नावांची सुनावणी घेतली जाणार आहे. यासाठी आतापर्यंत एकूण ३५ हजार मतदारांना नोटीस बजावण्यात आली असून, त्यांची सुनावणी ३० सप्टेंबरपर्यंत घेतली जाणार आहे.
नोटीस बजावण्यात आलेल्या मतदारांनी सुनावणीसाठी आवश्यक ती कागदपत्रे उपलब्ध करून ठेवावीत, असे आवाहन निवडणूक विभागाकडून करण्यात आले आहे.
