विद्यार्थ्यांना मनस्ताप; पुन्हा परीक्षा घेण्याची प्रशासनाकडे मागणी
परभणी (BEd CET Exam) : येथील एमआयडीसी परिसरात असलेल्या एमजीएम सेंटरमध्ये शॉर्टसर्किटमुळे आज शुक्रवार २७ मार्च रोजी होणारी बीएड सीईटी परीक्षा रद्द झाली आहे. त्यामुळे २९० विद्यार्थ्यांना नाहक मनस्ताप सहन करावा लागला असून पुन्हा परीक्षा घ्यावी अशी मागणी विद्यार्थ्यांनी प्रशासनाकडे केली आहे.
शहरातील एमजीएम सेंटरवर आज बीएड सिईटी परीक्षा (BEd CET Exam) महाराष्ट्र राज्य सीईटी सेल कडून घेण्यात येणार होती या परीक्षेसाठी जवळपास २९० विद्यार्थी हजर झाले. सकाळी साडेनऊ वाजता परीक्षा केंद्रावर पोहोचलेल्या विद्यार्थ्यांना अकरा वाजले तरी प्रवेश देण्यात आला नाही. त्यामुळे ताटकळत बसलेल्या विद्यार्थ्यांनी याचे कारण सेंटर वाल्याना विचारले असता, शॉर्टसर्किट झाले आहे. कम्प्युटर सुरू होणार नाहीत त्यामुळे परीक्षा होणार नाही. असे सांगण्यात आले.
यावेळी परीक्षा देण्यासाठी आलेल्या विद्यार्थी, विद्यार्थ्यांनी, विवाहित महिला यांना मनस्तापाला सामोरे जावे लागले. परीक्षा रद्द झाल्यामुळे वर्ष वाया जाणार तसेच परीक्षा फॉर्म भरण्याचा पंधराशे रुपये तसेच शंभर ते दोनशे किलोमीटर वरून सेंटरवर येण्यासाठी लागलेला आर्थिक भार, त्यातच पेट्रोल, डिझेल तुटवडा यामुळे परीक्षार्थींना अनेक समस्यांचा सामना करत सेंटर गाठावे लागले. त्यामुळे पुन्हा परीक्षा घ्यावी, तसेच विनाकारण बसलेला भुर्दंड भरून द्यावा तसेच गैरसोयीला सीईटी सेलला दोषी ठरवावे अशी मागणी प्रशासनाकडे केली आहे. दरम्यान सेंटर वरील नियंत्रकाने परीक्षा रद्द झाल्याची जाहीर केले. याबाबत सीईटी सेलला कळविले असून परीक्षा पुन्हा घेण्याची विनंती केली असल्याचे सांगितले आहे.
