गुळ घेऊन नागपूरला जाणार्‍या ट्रक चालकाचा ठाणा गावाजवळ संशयास्पद मृत्यू!

गोंदियात खळबळ: मृतदेहावर जखमा आणि रक्ताचे थारोळे

घातपाताची दाट शक्यता; आमगाव पोलिसांकडून तपास सुरू

आमगाव/ गोंदिया (Truck Driver Death) : गोंदिया-आमगाव रस्त्यावरील ठाणा गावाच्या शिवारात एका ट्रक चालकाचा अत्यंत संशयास्पद रित्या गळफास घेतलेल्या अवस्थेत मृतदेह आढळून आल्याने संपूर्ण जिल्ह्यात प्रचंड खळबळ उडाली आहे. मृत चालकाच्या शरीरावर आणि पायावर गंभीर जखमा असून घटनास्थळी रक्ताचे थारोळे दिसून आले आहे. त्यामुळे हा आत्महत्येचा प्रकार नसून, घातपात (खून) असण्याची दाट शक्यता वर्तवली जात आहे. केशव उके (वय २५ वर्षे, रा.बारबती, जिल्हा शिवनी, मध्यप्रदेश) असे मृत ट्रक चालकाचे नाव आहे.

सविस्तर असे की, आमगाव-गोंदिया रोडवरील ठाणा गावाच्या परिसरात एक ट्रक गेल्या दोन ते तीन दिवसांपासून एकाच जागेवर संशयास्पद (Truck Driver Death) स्थितीत उभा होता. ट्रकमधून अचानक तीव्र दुर्गंधी येऊ लागल्याने स्थानिक नागरिकांना संशय आला. त्यांनी ट्रकमध्ये डोकावून पाहिले असता, चालकाचा मृतदेह ट्रकच्या दोरीला बांधलेल्या आणि गळफास घेतलेल्या अवस्थेत लटकताना दिसून आला. नागरिकांनी तातडीने या घटनेची माहिती आमगाव पोलिसांना दिली. घटनेची माहिती मिळताच आमगाव पोलिसांनी तातडीने घटनास्थळी धाव घेत मृतदेह ताब्यात घेतला आणि उत्तरीय तपासणीकरीता शासकीय रुग्णालयात पाठवला. पोलिसांनी घटनास्थळाचा रीतसर पंचनामा केला असून, या गुंतागुंतीच्या प्रकरणात फॉरेन्सिक टीमचीही मदत घेतली जाण्याची शक्यता आहे. हा (Truck Driver Death) घातपाताचा गुन्हा आहे की आणखी काही, या दृष्टीने आमगाव पोलिस आता वेगवेगळ्या कोनातून कसून तपास करत आहेत. प्राथमिक तपासाअंती आणि शवविच्छेदन अहवालानंतरच मृत्यूचे खरे कारण स्पष्ट होईल, अशी माहिती पोलिसांनी दिली आहे.

आत्महत्या की खून? पोलिसांसमोर प्रश्न!

वरकरणी हा आत्महत्येचा मामला दाखवण्याचा प्रयत्न केला गेला असला, तरी घटनास्थळावरील परिस्थिती वेगळाच इशारा करत आहे. मृत केशवच्या पायावर, गळ्यावर आणि शरीराच्या इतर भागांवर गंभीर जखमांच्या खुणा आहेत. सामान्यतः गळफास घेतलेल्या घटनेत इतक्या मोठ्या प्रमाणात रक्तस्त्राव होत नाही, मात्र घटनास्थळी मृतदेहाच्या खाली रक्ताचे थारोळे साचले होते. मृतदेह दोन ते तीन दिवस जुना असावा, असा प्राथमिक अंदाज आहे.

नागपूरचा ट्रक गोंदियात कसा आला?

या संपूर्ण प्रकरणात सर्वात मोठा पेच हा आहे की, संबंधित चालक ट्रकमध्ये गुळ भरून तो नागपूर येथे खाली करण्यासाठी निघाला होता. मग नागपूरला जाणारा ट्रक अचानक मार्ग बदलून गोंदिया जवळील आमगाव परिसरात कसा काय पोहोचला? त्याचे कोणाशी काही भांडण झाले होते का? की चालकाचे अपहरण (Truck Driver Death) करून त्याला या निर्जन स्थळी आणून संपवण्यात आले? असे अनेक अनुत्तरीत प्रश्न आता उपस्थित होत आहेत.