झांशी : बागेश्वर धामचे प्रमुख आणि कथाकार धीरेंद्र कृष्ण शास्त्री पुन्हा एका आरोपामुळे चर्चेत आले आहेत. “पुत्रयोग बनेगा” असा दावा केल्यानंतर 10 वर्षांनी पुन्हा अपत्याचे नियोजन करणाऱ्या एका भक्ताच्या घरी चौथ्या अपत्याच्या रूपातही मुलगीच जन्माला आल्याने त्याने आर्थिक व मानसिक फसवणूक झाल्याचा आरोप केला आहे. उत्तर प्रदेशातील झांशी येथील राजेंद्र कुमार यांनी याप्रकरणी अखिल भारतीय अंधश्रद्धा निर्मूलन समितीकडे (अंनिस) तक्रार केली आहे.
नेमका आरोप काय?
झांशीच्या मगरवाडा परिसरातील रहिवासी राजेंद्र कुमार मार्च 2024 पासून बागेश्वर धाम येथे जात असल्याचे सांगतात. मे 2024 मध्ये धीरेंद्र कृष्ण शास्त्री यांनी त्यांना बोलावून त्यांच्या नावाची ‘पर्ची’ काढल्याचा दावा राजेंद्र कुमार यांनी केला आहे.
या पर्चीमध्ये त्यांच्या पत्नीला “प्रेतबाधा” असल्याचे नमूद करण्यात आले होते. त्यासाठी 21 पेशी कराव्या लागतील आणि त्यानंतर “पुत्रयोग बनेगा”, असा दावा लिखित स्वरूपात करण्यात आल्याचे राजेंद्र कुमार यांचे म्हणणे आहे.
या दाव्यावर विश्वास ठेवून त्यांनी तब्बल 10 वर्षांनंतर पुन्हा अपत्याचे नियोजन केले. मात्र, नुकताच त्यांच्या पत्नीने मुलीला जन्म दिला. यापूर्वी त्यांना तीन मुली असून, शास्त्री यांच्या दाव्यानंतरही चौथी मुलगी झाल्याने आपली आर्थिक आणि मानसिक फसवणूक झाल्याचा आरोप राजेंद्र कुमार यांनी केला आहे.
‘अंनिस’कडून 1 कोटींचे आव्हान
या प्रकारामुळे इतरांनी अशा दाव्यांवर विश्वास ठेवू नये, या उद्देशाने राजेंद्र कुमार यांनी अखिल भारतीय अंधश्रद्धा निर्मूलन समितीचे संघटक हरीश देशमुख यांच्याशी संपर्क साधून तक्रार केली.
राजेंद्र कुमार यांच्या तक्रारीनंतर अंनिसने धीरेंद्र कृष्ण शास्त्री यांच्या कथित चमत्कारांच्या दाव्यांच्या वैज्ञानिक पडताळणीची मागणी केली आहे. हे दावे वैज्ञानिक पद्धतीने सिद्ध करून दाखविल्यास 1 कोटी रुपयांचे बक्षीस देऊ, असे आव्हान अंनिसच्या पदाधिकाऱ्यांनी दिले आहे.
तसेच, कोणत्याही प्रकारच्या भ्रामक दाव्यांवर डोळसपणे विचार न करता विश्वास ठेवू नये, असे आवाहनही अंनिसकडून करण्यात आले आहे. या प्रकरणातील पुढील घडामोडींकडे आता लक्ष लागले आहे.
कोण आहेत धीरेंद्र कृष्ण शास्त्री?
धीरेंद्र कृष्ण शास्त्री हे मध्य प्रदेशातील छतरपूर जिल्ह्यातील गार्हा येथील बागेश्वर धामशी संबंधित कथावाचक म्हणून प्रसिद्ध आहेत. धार्मिक कथा, हनुमान भक्ती आणि भागवत कथांच्या माध्यमातून त्यांनी आपली ओळख निर्माण केली असून, अनुयायांमध्ये त्यांना ‘बागेश्वर धाम महाराज’ या नावानेही संबोधले जाते.
धीरेंद्र कृष्ण शास्त्री यांचा जन्म जुलै 1996 मध्ये मध्य प्रदेशातील छतरपूर जिल्ह्यातील एका छोट्या गावात झाला. धार्मिक वातावरणात त्यांचे बालपण गेले. त्यांच्या वडिलांचा कथावाचन आणि पुजारी म्हणून धार्मिक कार्याशी संबंध असल्याचे उपलब्ध माहितीत नमूद आहे. प्राथमिक शिक्षण गावातील सरकारी शाळेत घेतल्यानंतर त्यांनी बारावीपर्यंत शिक्षण घेतल्याचे सांगितले जाते.
लहान वयातच त्यांनी गावात धार्मिक कथा सांगण्यास सुरुवात केली. त्यानंतर इतर गावांमध्येही त्यांच्या कथांचे आयोजन होऊ लागले. छतरपूर जिल्ह्यातील गार्हा येथील बागेश्वर धाम हे पुढे त्यांचे प्रमुख धार्मिक केंद्र बनले.
भक्तांच्या समस्या ‘पर्ची’च्या माध्यमातून सांगितल्याच्या दाव्यामुळे धीरेंद्र कृष्ण शास्त्री मोठ्या प्रमाणावर चर्चेत आले. त्यांच्या समर्थकांकडून या पद्धतीकडे धार्मिक श्रद्धेचा भाग म्हणून पाहिले जाते. दुसरीकडे, अखिल भारतीय अंधश्रद्धा निर्मूलन समितीसह काही संघटनांकडून त्यांच्या कथित चमत्कार आणि दाव्यांची वैज्ञानिक पडताळणी करण्याची मागणी करण्यात आली आहे.
