जम्मू-काश्मीरमध्ये सुरक्षा दलांनी मोठी कारवाई करत पहलगाम दहशतवादी हल्ल्याशी संबंधित पाकिस्तानी दहशतवादी यासिर याला ठार केले. बडगाम जिल्ह्यातील अशदर गली परिसरात सुरक्षा दल आणि दहशतवाद्यांमध्ये झालेल्या चकमकीत ही कारवाई करण्यात आली. ‘ऑपरेशन अशदर’ अंतर्गत करण्यात आलेल्या या कारवाईनंतर पहलगाम हल्ल्यात सहभागी असलेल्या चारही दहशतवाद्यांचा खात्मा झाल्याचे समोर आले आहे.
यासिर हा पाकिस्तानचा नागरिक असून लष्कर-ए-तैयबाशी संबंधित असल्याची माहिती सुरक्षा यंत्रणांनी दिली आहे. २२ एप्रिल २०२५ रोजी पहलगामच्या बैसरन खोऱ्यात झालेल्या दहशतवादी हल्ल्यात २६ जणांचा मृत्यू झाला होता. या हल्ल्यानंतर सुरक्षा यंत्रणांनी सहभागी दहशतवाद्यांचा शोध सुरू केला होता.
पहलगाम हल्ल्याशी संबंधित चार प्रमुख दहशतवाद्यांमध्ये यासिरसह सुलेमान शाह, जुनैद रमजान आणि हाशिम मूसा यांचा समावेश असल्याचे वृत्त आहे. यापैकी इतर दहशतवाद्यांवर यापूर्वीच कारवाई करण्यात आली होती. आता यासिरच्या खात्म्यामुळे हल्ल्यात सहभागी असलेल्या चारही दहशतवाद्यांचा सफाया झाल्याचे सुरक्षा यंत्रणांकडून सांगण्यात आले आहे.
सुरक्षा दलांनी जम्मू-काश्मीरमध्ये दहशतवादाविरोधातील कारवाया अधिक तीव्र केल्या असून, या कारवाईमुळे पहलगाम हल्ल्याच्या तपासाला आणि दहशतवादी नेटवर्कविरोधातील मोहिमेला महत्त्वाचे यश मिळाल्याचे मानले जात आहे.
