शुभमन गिलने रचला इतिहास; एक हजार धावांचा पराक्रम

कोलंबो (Shubman Gill) : भारतीय कर्णधार शुभमन गिलने श्रीलंकेविरुद्धच्या दुसऱ्या कसोटीतील पहिल्या डावात अर्धशतक झळकावत जागतिक कसोटी अजिंक्यपद स्पर्धेच्या एका पर्वात कर्णधार म्हणून एक हजार धावा पूर्ण केल्या. ही कामगिरी करणारा तो भारताचा पहिलाच कर्णधार ठरला आहे. गिलने २०२५-२७ या जागतिक कसोटी अजिंक्यपद पर्वात कर्णधार म्हणून दहा सामन्यांच्या १७ डावांत १,०२४ धावा केल्या आहेत. कोलंबोतील सिंहलीज स्पोर्ट्स क्लब मैदानावर त्याने १०८ चेंडूंत ५० धावांची संयमी खेळी केली. त्याच्या खेळीत पाच चौकारांचा समावेश होता.

जागतिक कसोटी अजिंक्यपदाच्या यापूर्वीच्या एका पर्वात भारताच्या कोणत्याही कर्णधाराला एक हजार धावांचा टप्पा गाठता आला नव्हता. विराट कोहली आणि रोहित शर्मा यांनाही कर्णधार म्हणून एका पर्वात ही कामगिरी करता आली नाही.

गिलने २०२५ मध्ये इंग्लंडविरुद्धच्या मालिकेपासून भारतीय कसोटी संघाची सूत्रे स्वीकारली. (Shubman Gill) कर्णधारपदाच्या सुरुवातीच्या काळातच त्याने फलंदाजीत सातत्यपूर्ण कामगिरी केली. इंग्लंडविरुद्धच्या पाच कसोटी सामन्यांच्या मालिकेत त्याने ७५४ धावा काढल्या होत्या. त्यामध्ये चार शतकांचा समावेश होता. श्रीलंकेविरुद्धचे अर्धशतक पूर्ण करताना गिलने कसोटी कारकिर्दीतील तीन हजार धावांचा टप्पाही पार केला. त्याने वयाच्या २६ वर्षे ३४९ दिवसांत हा टप्पा गाठला.