परभणी (Kisan Farmer Id) : पाथरी फार्मर आयडी ऑनलाईन अर्ज प्रलंबित राहिल्याने त्रस्त झालेल्या एका शेतकऱ्याने तहसील कार्यालयासमोर आत्मदहनाचा प्रयत्न केल्याची धक्कादायक घटना सोमवार २७ एप्रिल रोजी दुपारी सुमारे सव्वातीन वाजण्याच्या सुमारास घडली.
दत्ता रामराव घाडगे (रा. पाथरगव्हाण ता. पाथरी) यांनी शेतकरी ओळख क्रमांक ( फार्मर आयडी ) मिळविण्यासाठी ऑनलाईन अर्ज केला होता. सदर अर्ज तलाठी स्तरावर मंजूर झाला असला तरी पुढील स्तरावर तहसील कार्यालयात प्रलंबित असल्याने त्यांना अद्याप शेतकरी ओळख क्रमांक प्राप्त झाला नव्हता. याबाबत त्यांनी अनेकदा तहसील कार्यालयात पाठपुरावा केला. मात्र संबंधित अधिकारी अनुपस्थित राहणे किंवा जबाबदारी टाळली जाणे यामुळे त्यांचे काम दीर्घकाळ प्रलंबित राहिले. यामुळे मानसिक ताण वाढल्याने घाडगे यांनी सोमवारी तहसीलदारांना लेखी निवेदन दिले होते. या निवेदनात शेतकरी ओळख क्रमांक अभावी शेतीची कामे ठप्प होत असून आर्थिक व मानसिक अडचणी निर्माण झाल्याचे त्यांनी नमूद केले होते.
निवेदन दिल्यानंतर काही वेळातच घाडगे यांनी तहसील कार्यालयासमोरील प्रांगणात स्वतःच्या अंगावर पेट्रोल ओतून आत्मदहन करण्याचा प्रयत्न केला. मात्र उपस्थित नागरिक व कर्मचाऱ्यांनी प्रसंगावधान राखत त्यांच्या हातातील पेट्रोलचा कॅन व आगपेटी हिसकावून घेतल्याने मोठी दुर्घटना टळली. दरम्यान घटनेनंतर प्रशासनाने तात्काळ दखल घेत अर्जदारास लेखी आश्वासन देत त्यांचा शेतकरी ओळख क्रमांक लवकरात लवकर देण्यात येईल असे सांगितले. या (Kisan Farmer Id) घटनेमुळे तहसील कार्यालयातील कारभाराबाबत संताप व्यक्त होत असून प्रशासकीय दिरंगाईवर प्रश्नचिन्ह उपस्थित होत आहे.
