भानखेडा गावावर शोककळा: पेरणीपूर्व मशागती दरम्यान घडली दुर्दैवी घटना
सेनगाव (Youth Farmer Death) : तालुक्यातील भानखेडा येथे शेतात नांगरणीचे काम सुरू असताना अचानक वीज कोसळून एका ३५ वर्षीय तरुण शेतकर्‍याचा जागीच मृत्यू झाल्याची हृदयद्रावक घटना सोमवारी, २५ मे रोजी रात्री घडली. जगन सिताराम कोटकर असे मृत शेतकर्‍याचे नाव असून या घटनेमुळे संपूर्ण भानखेडा गावावर शोककळा पसरली आहे.
भानखेडा शिवारात जगन कोटकर यांची सुमारे दोन एकर शेती आहे. खरीप हंगामाच्या पार्श्वभूमीवर सध्या पेरणीपूर्व मशागतीची कामे सुरू आहेत. दिवसभर प्रचंड उष्मा असल्याने अनेक शेतकरी सकाळी व सायंकाळी शेतीची कामे करतात. त्यानुसार जगन कोटकर हे सोमवारी सायंकाळी नागोजी कोटकर व रामकिसन कोटकर यांच्यासह शेतात नांगरणीसाठी गेले होते. रात्री साडेनऊच्या सुमारास परिसरात अचानक वादळी वार्‍यासह विजांचा कडकडाट सुरू झाला आणि मान्सूनपूर्व पावसाने हजेरी लावली. याचवेळी विजेचा जोरदार लोळ जगन कोटकर यांच्या अंगावर कोसळला. या (Youth Farmer Death) भीषण घटनेत त्यांचा जागीच मृत्यू झाला. सुदैवाने त्यांच्यासोबत असलेले नागोजी व रामकिसन काही अंतरावर असल्याने ते थोडक्यात बचावले. घटनेची माहिती मिळताच ग्रामस्थांनी घटनास्थळी धाव घेतली. तहसीलदार सखाराम मांडवगडे यांनी तातडीने महसूल कर्मचार्‍यांना घटनास्थळी पाठवून पंचनामा केला. सेनगाव पोलिस प्रशासनानेही घटनास्थळी जाऊन पाहणी केली.
मयत जगन कोटकर (Youth Farmer Death) यांचा मृतदेह उत्तरीय तपासणीसाठी सेनगाव येथील ग्रामीण रुग्णालयात दाखल करण्यात आला आहे. त्यांच्या पश्चात आई, पत्नी, एक मुलगा व भाऊ असा परिवार आहे. कष्टाळू व मनमिळावू स्वभावामुळे परिसरात परिचित असलेल्या जगन यांच्या अकाली निधनाने गावात हळहळ व्यक्त होत आहे.
