चंद्रपूर (Chandrapur):- नागभीड तालुक्यातील बाळापुर खुर्द गावात आज सोमवारी सकाळी साडेसात वाजता एका बंद घरामध्ये बिबट्याचे (Leopard) तीन पिल्ले आढळल्याने गावात दहशतीचे वातावरण निर्माण झाले आहे. मागील पंधरा दिवसापासून या गावात बिबट्याची वर्दळ सुरु होती. गाव दहशतित असतानाच आज ही घटना घडली.
गावात भीतीचे वातावरण निर्माण झाले
याच काळामध्ये गावातील अनेक पाळीव प्राण्यांना या मादी बिबट्याने आपले भक्ष्य बनवले होते. त्यामुळे गावात भीतीचे वातावरण निर्माण झाले होते.
बिबट्याचे तीन शावक घरात सापडल्याने गावकऱ्याने पाहण्यासाठी गर्दी (Crowd)केली आहे. मात्र या बिबट्याचा आपल्या पिल्यांसाठी पुन्हा धुमाकूळ होण्याची भीती नाकारता येत नसल्याने वन विभागाने(Forest Department) घटनास्थळी चमू तैनात केली असून गावकऱ्यांना सतर्क राहण्याचा इशाराही वन विभागाकडून देण्यात आला आहे. गावातील वाघिणीने मारलेल्या गुरांमध्ये लोकेश ठवरे, काशिनाथ तरोणे, दिलीप सोनकर, शंकर व्हटकर, मंगेश गोंगल यांच्या गुरांचा समावेश आहे. बिबट्याच्या या हल्ल्यांमुळे गावातील लोक घाबरले असून त्यांच्या सुरक्षेची त्यांना भीती वाटत आहे.
