महाराष्ट्र -छत्तीसगड सिमेवर गडचिरोली पोलिसांची कारवाई
गडचिरोली (Gadchiroli Naxal base) : जिल्ह्यातील भामरागड तालुक्यात महाराष्ट्र-छत्तीसगड सीमेजवळ नव्याने स्थापन करण्यात आलेल्या कवंडे पोलीस ठाण्या जवळ नक्षल्यांच्या भामरागड दलमने घातपात करण्याच्या उद्देशाने तळ उभारल्याची माहिती मिळताच गडचिरोली पोलिसांनी नक्षलविरोधी शोध मोहीम राबवून नक्षल्यांचा तळ उद्ध्वस्त करण्यासोबतच शस्त्रसाठा जप्त केल्याची कारवाई आज १२ मे रोजी सकाळच्या सुमारास केली.
नक्षल्यांनी तळ उभारल्याची माहिती मिळताच अपर पोलीस अधीक्षक (प्रशासन) श्री. एम. रमेश यांच्या नेतृत्वाखाली सी-६० चे सुमारे २०० जवानांचे विशेष अभियान काल संध्याकाळी राबवण्यात आले. आज दि. १२ मे रोजी सकाळच्या सुमारास सदर जंगल परिसरात शोध घेत असताना नक्षल्यांनी पोलिसांवर हल्ला चढवून अंदाधुंद गोळीबार केला. सी-६० जवानांनी त्वरित प्रत्युत्तर दिले. ही चकमक तीन वेगवेगळ्या ठिकाणी जवळपास दोन तास चालू होती.
चकमकीनंतर परिसरात करण्यात आलेल्या शोधमोहीमेदरम्यान एक स्वयंचलित इन्सास रायफल, एक सिंगल शॉट रायफल, एक मॅगझीन, अनेक जिवंत काडतुसे, डिटोनेटर, एक रेडिओ, तीन पिट्टु (सामानाची पिशवी), वॉकीटॉकी चार्जर इ. मोठ्या प्रमाणात नक्षलवादी साहित्य आणि वैयक्तिक वस्तू जप्त केल्या.चकमकीत काही नक्षली जखमी अथवा ठार झाल्याची शक्यता असून त्यांना इतर माओवाद्यांनी जंगलात नेले असण्याची शक्यता पोलिसांनी व्यक्त केली आहे.
नक्षलविरोधी शोध मोहीम तीव्र
भामरागड तालुक्यातील कवंडे पोलीस ठाण्याच्या हद्दित नक्षलविरोधी शोधमोहीम तीव्र करण्यात आली आहे. या जंगल परीसरात नक्षली असल्याची शक्यता गृहीत धरून वरीष्ठ पोलीस अधिकारी या मोहीमेवर जातीने लक्ष ठेऊन असल्याची माहिती पोलीस विभागाकडून देण्यात आली आहे.
