स्त्री रुग्णालय गर्भवती महिला मृत्यू प्रकरण; सात सदस्यीय समितीकडून चौकशी....!
परभणी (Pregnant woman's death case) : येथील जिल्हा शासकीय स्त्री रुग्णालयात वेळेत रुग्णवाहिका न मिळाल्यामुळे एका गर्भवती महिलेसह तिच्या पोटातील बाळाचा दुर्दैवी मृत्यू झाल्याची अत्यंत धक्कादायक घटना घडली होती. दैनिक देशोन्नती’ने या प्रकरणाचे गांभीर्य ओळखून ही बातमी लावून धरली होती. या वृत्ताची तत्काळ दखल घेत आरोग्य विभागाने उच्चस्तरीय चौकशीचे आदेश दिले होते. अखेर या प्रकरणात निष्काळजीपणा दाखवल्याचा ठपका ठेवत रुग्णवाहिका सुविधातील सुमित कंपनीच्या दोन डॉक्टर आणि दोन कर्मचार्‍यांना सोमवार १० रोजी सायंकाळी निलंबित करण्यात आल्याची माहिती सुमित कंपनीच्या अधिकार्‍यांनी दिली.
या (Pregnant woman's death case) घटनेच्या सखोल तपासासाठी आरोग्य विभागाचे सहाय्यक संचालक दयानंद मोतीपवळे यांच्या अध्यक्षतेखाली सात सदस्यांची विशेष चौकशी समिती परभणीत दाखल झाली आहे. या समितीने नुकतीच परभणीच्या जिल्हा शासकीय स्त्री रुग्णालयाला सोमवार १० रोजी सायंकाळी भेट देऊन प्रत्यक्ष पाहणी करत चौकशी सुरू केली. तसेच मंगळवारी जिल्हा रुग्णालयात संबंधितांचे जबाब नोंदविण्यात येत आहेत.
या (Pregnant woman's death case) घटनेस जबाबदार धरण्यात आलेल्या रुग्णवाहिकेचे डॉ. कुलदीप चोरमले डॉ. अभिजीत इप्पर या दोन डॉक्टरांसह १०८ रुग्णवाहिका चालक मोहम्मद जलाल तसेच केशव यादव या चार जणांचे सुमित कंपनीने निलंबनाचे आदेश काढण्यात आले आहेत. याबाबत रुग्णवाहिका चालक व डॉक्टर या सर्वांची तब्बल दोन तास कसून चौकशी केली. या चौकशीत वैद्यकीय सेवा पुरवण्यात गंभीर हलगर्जीपणा झाल्याचे समोर आले.
'दैनिक देशोन्नती' च्या बातमीचा दणका!
या संवेदनशील घटनेनंतर 'दैनिक देशोन्नती'ने सातत्याने पाठपुरावा करत प्रशासनाला जाब विचारला होता. अखेर या बातमीची दखल घेत आरोग्य विभागाने दोषींवर तातडीने निलंबनाची कडक कारवाई केल्याने, पीडित कुटुंबाला न्याय मिळण्याच्या दृष्टीने पहिले पाऊल पडले आहे.
