‘उद्धव मस्के’ यांच्या नावाऐवजी ‘उद्धव ठाकरे’ अशी नोंद; दिलीप घुगे यांची निवडणूक प्रशासनाकडे तक्रार
मराठवाडा पदवीधर मतदारसंघाच्या प्रारूप मतदार यादीतील नोंदींवरून प्रशासकीय यंत्रणेच्या कार्यपद्धतीवर प्रश्न उपस्थित झाले आहेत. छत्रपती संभाजीनगर विभाग पदवीधर मतदारसंघाच्या यादीत शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे यांचे नाव आढळल्याने राजकीय चर्चेला उधाण आले आहे. विशेष म्हणजे, हे नाव दोन ठिकाणी नोंदवले गेल्याचा दावा करण्यात आला आहे.
या प्रकाराची माहिती समोर आल्यानंतर महाविकास आघाडीचे अधिकृत उमेदवार दिलीप हरिभाऊ घुगे यांनी निवडणूक प्रशासनाकडे आक्षेप नोंदवला आहे. घुगे यांनी निवडणूक निर्णय अधिकारी तथा विभागीय आयुक्तांना ईमेलद्वारे पत्र पाठवून मतदार यादीतील त्रुटी तातडीने दूर करण्याची मागणी केली आहे.
प्रारूप मतदार यादीतील भाग क्रमांक ६५० आणि अनुक्रमांक १५० मध्ये ‘उद्धव मस्के’ यांच्या नावाच्या जागी ‘उद्धव ठाकरे’ असे नाव छापण्यात आल्याचे सांगण्यात येत आहे. यामुळे संबंधित मतदाराच्या नोंदीत गंभीर स्वरूपाची चूक झाल्याचा दावा करण्यात आला आहे.
याशिवाय, एकाच कुटुंबातील मतदारांच्या नावांची नोंद वेगवेगळ्या भागांमध्ये करण्यात आल्याचेही घुगे यांनी निदर्शनास आणून दिले आहे. कुटुंबातील एका सदस्याचे नाव भाग क्रमांक ६४६ मध्ये, तर दुसऱ्या सदस्याचे नाव भाग क्रमांक ६५४ मध्ये नोंदवण्यात आले आहे.
भाग क्रमांक ६५४ मधील मतदान केंद्र संबंधित मतदारांच्या घरापासून सुमारे १० किलोमीटर अंतरावर असल्याचा आक्षेपही घेण्यात आला आहे. त्यामुळे मतदानाच्या दिवशी संबंधित मतदारांना अनावश्यक अडचणींचा सामना करावा लागू शकतो, अशी भूमिका दिलीप घुगे यांनी मांडली आहे.
मतदार यादीतील नावांच्या नोंदीपासून मतदान केंद्राच्या वाटपापर्यंत अनेक त्रुटी असल्याचा आरोप करत घुगे यांनी या सर्व बाबींची तातडीने तपासणी करण्याची मागणी केली आहे. मतदार याद्यांमधील चुका वेळेत दुरुस्त न झाल्यास त्याचा थेट परिणाम मतदान प्रक्रियेवर होण्याची शक्यता असल्याचा इशाराही त्यांनी दिला आहे.
