नवी दिल्ली (Satish Shah) : चित्रपट सृष्टीतील दुःखद बातमी समोर आली आहे. प्रसिद्ध विनोदी अभिनेते सतीश शाह यांचे शनिवारी निधन झाले. त्यांनी वयाच्या 74 व्या वर्षी मुंबईत अखेरचा श्वास घेतला. वृत्तानुसार, ते बऱ्याच काळापासून मूत्रपिंडाच्या गंभीर आजाराने ग्रस्त होते आणि मूत्रपिंड निकामी झाल्यामुळे त्यांचे निधन झाले. प्रसिद्ध निर्माते आणि आयएफटीडीएचे अध्यक्ष अशोक पंडित यांनी याची पुष्टी केली.
सतीश शाह हे भारतीय चित्रपट आणि टेलिव्हिजन उद्योगातील एक प्रसिद्ध अभिनेते होते. अशोक पंडित म्हणाले, “सतीश शाह आता नाहीत. ते माझे चांगले मित्र होते. मूत्रपिंड निकामी झाल्यामुळे त्यांचे निधन झाले. त्यांना अचानक वेदना जाणवल्या आणि त्यांची प्रकृती बिघडली. त्यांना दादर शिवाजी पार्क येथील हिंदुजा रुग्णालयात नेण्यात आले, जिथे त्यांचे निधन झाले.”
पार्थिव घरी आणणार!
सतीश शाह यांचे निधन ही उद्योगासाठी मोठी हानी आहे. त्यांचे पार्थिव वांद्रे येथील त्यांच्या कलानगर येथील घरी आणले जाईल आणि उद्या, 26 ऑक्टोबर रोजी अंत्यसंस्कार होतील. त्यांनी त्यांच्या उत्तम अभिनयाने आणि उत्कृष्ट विनोदी वेळेने प्रेक्षकांच्या मनात एक विशेष स्थान निर्माण केले. त्यांनी टेलिव्हिजन आणि चित्रपट दोन्ही क्षेत्रात मने जिंकली.
टीव्हीद्वारे ओळख!
सतीश शाह यांचा जन्म 25 जून 1951 रोजी मुंबईत झाला. त्यांनी मुंबईतील सेंट झेवियर्स कॉलेजमधून शिक्षण पूर्ण केले आणि नंतर त्यांनी एफटीआयआय (Film and Television Institute of India) मधून अभिनयाचे प्रशिक्षण घेतले. त्यांनी १९७० च्या दशकात चित्रपटसृष्टीतील कारकिर्दीला सुरुवात केली, परंतु त्यांना खरी ओळख “ये जो है जिंदगी” या टीव्ही शोने मिळाली, ज्यामध्ये त्यांनी प्रत्येक भागात वेगवेगळी पात्रे साकारली. बॉलिवूडमध्ये त्यांनी “मैने प्यार किया”, “हम आपके हैं कौन”, “कल हो ना हो”, “ओम शांती ओम” आणि “सत्यमेव जयते” यासह अनेक हिट चित्रपटांमध्ये संस्मरणीय भूमिका केल्या.
