भिवापूर (Tiger Attack) : तालुक्यातील बेसूर येथून तीन किमी अंतरावर असलेल्या खंडाळझरी शेतशिवारात कापूस वेचणाऱ्या महिलेवर वाघाने हल्ला करून तिला गंभीररित्या जखमी केल्याची घटना आज ३१ डिसेंबर मंगळवारला साडेबारा वाजताच्या सुमारास घडली .या घटनेमुळे मजूर व शेतकऱ्यांमध्ये दहशतीचे वातावरण निर्माण झाले आहे.
जखमी महिलेचे नाव इंदिराबाई तुळशिराम मसराम वय ४५ वर्ष असून ती खंडाळझरी येथील रहिवासी आहे. इंदिराबाई ही काही महिलांना सोबत घेऊन कापूस काढत असताना अचानक वाघाने मागून तिच्यावर हल्ला केला. अचानक झालेल्या (Tiger Attack) हल्ल्यामुळे ती घाबरली व तिने आरडाओरड केली. जवळच असलेल्या इंदिराबाईच्या पुतण्याने तिच्याकडे धाव घेतली .व आरडाओरड करु लागला.
त्यामुळे वाघाने तिथून पळ काढला. परंतू या (Tiger Attack) हल्ल्यात इंदिराबाई हि गंभीर जखमी झाली असून तिला ग्रामीण रुग्णालय उमरेड येथे दाखल करण्यात आले. तिच्यावर वैधकीय अधिकारी डॉ. जुनघरे यांनी प्राथमिक उपचार केल्यानंतर तिला सायंकाळी ४ वाजता नागपूर मेडिकल कॉलेज येथे पुढील उपचारासाठी पाठविण्यात आले. या घटनेमुळे परिसरात एकच खळबळ उडाली आहे.
