लातूर (Latur):- उदगीर येथील रामनगरमध्ये कुक्कुट पक्ष्यांना बर्ड फ्ल्यूचे (Bird Flu)निदान झाले आहे. भोपाळ येथील राष्ट्रीय उच्च सुरक्षा पशुरोग संस्थेचा याबाबतचा अहवाल प्राप्त झाला आहे. बर्ड फ्ल्यूचा प्रसार रोखण्यासाठी जिल्हाधिकाऱ्यांच्या आदेशानुसार प्रशासनाने तात्काळ उपाययोजना सुरू केल्या आहेत. येथील एक किलोमीटर परिसरातील कुक्कुट पक्ष्यांची शास्त्रोक्त पद्धतीने विल्हेवाट लावण्याची कार्यवाही सुरू करण्यात आली आहे. याबाबत पालकमंत्री(Guardian Minister) शिवेंद्रसिंहराजे भोसले यांनी आवश्यक उपाययोजना गतीने करण्याच्या सूचना दिल्या आहेत.
किलोमीटर परिसरातील पक्ष्यांची लावणार विल्हेवाट
उदगीर शहरातील कावळ्यांचा बर्ड फ्ल्यूने मृत्यू झाल्याचे निष्पन्न झाल्यानंतर प्रतिबंधात्मक उपाययोजना हाती घेवून शहरातली कुक्कुट पक्ष्यांचे वैद्यकीय नमुने तपासणीसाठी प्रयोगशाळेत (laboratory) पाठविण्यात आले होते. त्यापैकी रामनगर येथील कुक्कुट पक्ष्यांचा बर्ड फ्ल्यू विषयक तपासणी अहवाल सकारात्मक आला आहे. त्यामुळे या रोगाचा प्रादुर्भाव रोखण्यासाठी प्रादुर्भाव क्षेत्राच्या एक किलोमीटरच्या परिसरातील देशी आणि व्यावसायिक पक्ष्यांना शास्त्रोक्त पद्धतीने नष्ट करण्याचे आदेश देण्यात आले आहेत. त्यानुसार अंडी, खाद्यपदार्थ आणि पक्ष्यांचे सर्व अवशेषही नष्ट केले जात आहेत.
तसेच या परिसराच्या निर्जंतुकीकरणाची कार्यवाही सुरू करण्यात आली आहे. यामध्ये पशुसंवर्धन विभाग, महसूल विभाग, वन विभाग, नगरपालिका, पोलीस प्रशासन, जलसंपदा, बांधकाम, भूमि अभिलेख आणि परिवहन विभागाचे अधिकारी, कर्मचारी सहभागी झाले आहेत.
