साकोली (Food Poisoning) : शहरातील लग्न समारंभात सुमारे १०० लोकांना विषबाधा झाली असून ३७ रुग्ण साकोली उपजिल्हा रुग्णालयात दाखल आहेत. आरोग्य विभागाने तत्काळ तपासणी शिबिरे सुरू केली असून रुग्णांवर उपचार सुरू आहेत. शहरात गुरूवार दि. ५ जून २०२५ रोजी झालेल्या लग्न समारंभात सुमारे १०० लोकांना विषबाधा (Food Poisoning) झाली. ६ ते ८ जूनपर्यंत रुग्ण एकामागून एक साकोली रुग्णालयात उपचारासाठी येऊ लागले. परिणामी, ३७ जणांना साकोलीच्या उपजिल्हा रुग्णालयात दाखल करावे लागले आणि त्यांच्यावर उपचार सुरू करावे लागले तर काही जणांवर खाजगी रुग्णालयात उपचार झाले.
गुरूवारी संध्याकाळी साकोली शहरातील एकोडी रोडवर झालेल्या लग्न समारंभात सुमारे पाच हजार लोक उपस्थित होते. या लग्नात शहर आणि जिल्ह्यातील प्रसिद्ध व्यक्ती उपस्थित होत्या. या लग्न समारंभात लोकांनी जेवण केले आणि पाणी प्यायले. या कार्यक्रमाला दूरदूरच्या लोकांनी हजेरी लावली. ६ जूनपासून, कार्यक्रमानंतर दुसर्‍या दिवशी, काही लोकांना उलट्या, (Food Poisoning) भोवळ येणे अशा समस्या उद्भवल्या. ही लक्षणे असलेले अनेक लोक साकोलीच्या उपजिल्हा रुग्णालय आणि खाजगी रुग्णालयात उपचारासाठी येऊ लागले.
दि. ८ रोजी संध्याकाळपर्यंत ३७ जणांना साकोलीच्या उपजिल्हा रुग्णालयात दाखल करावे लागले. यामध्ये महिला, पुरुष आणि मुले यांचा समावेश होता. उपचारादरम्यान डॉक्टरांनी रुग्णांना सलाईन लावले. उपजिल्हा रुग्णालय आणि खासगी रुग्णालयाच्या ओपीडीमध्ये परिसरातील सुमारे १०० जणांना विषबाधा झाल्याची माहिती समोर आली. मात्र, गावाबाहेरून आलेल्या पाहुण्यांचे आकडे यामध्ये समाविष्ट नाहीत. या घटनेनंतर आरोग्य विभागही सतर्क झाला आहे. रुग्णांवर गंभीर उपचार केले जात आहेत.
दोन ठिकाणी आरोग्य शिबिरे
लग्नात जेवण केल्यानंतर विषबाधाचे अनेक रुग्ण आढळले, त्यामुळे खबरदारी म्हणून, आज साकोली येथे आरोग्य तपासणी शिबिराचे आयोजन करण्यात आले. दोन्ही ठिकाणी सुमारे ३० जणांची आरोग्य तपासणी करण्यात आली. (Food Poisoning) विषबाधाचे रुग्ण धोक्याबाहेर आहेत. परंतु रुग्ण सतत येत आहेत. त्यामुळे, सोमवारी दि.९ जून रोजी देखील आरोग्य तपासणी शिबिरांचे आयोजन केले जाणार आहे.
