आखाडा बाळापूर/हिंगोली (Akhara Balapur Bazar Samiti) : येथील बाजार समिती सभापती व उपसभापती निवड 15सप्टेंबर सोमवारी होणार आहे. बाजार समिती कार्यालयात याबाबत निवड प्रक्रिया कार्यक्रम सहाय्यक निबंधक तथा निवडणूक निर्णय अधिकारी अक्षय गुठ्ठे यांच्या अध्यक्षतेखाली सकाळी अकरा वाजता होणार आहे.
आखाडा बाळापूर बाजार समिती अटीतटीच्या झालेल्या निवडणूकीत आ.संतोष बांगर व शिवसेना नेते संजय पाटील बोंढारे नेतृत्वाखालील पैनलने 18 पैकी17 जागा एकहाती जिंकून बाजार समिती सत्ता सलग राखली होती. सदर पैनलच्या विरोधात सगळे पक्षनेते एकत्र आले परंतु त्यांना खातेही खोलता आले नव्हते उलट व्यापारी मतदारसंघात अपक्ष उमेदवारांने उलटफेर करत विजय मिळवला होता.31ऑगस्ट रोजी निवडणूक निकाल घोषित झाला होता आता 15सप्टेंबर रोजी नवीन सभापती उपसभापती निवड प्रक्रिया पार पडणार आहे. नवीन पदाधिकारी निवडीकडे लक्ष वेधले गेले आहे.
सभापती होणार दत्ता बोंढारे, उपसभापती कोण..
बाजार समिती राजकारणावर माजी सभापती संजय बोंढारे यांची पंचवीस वर्षांपासून पकड आहे ते स्वतः बारा वर्ष सभापती राहिले तर त्यांचे चिरंजीव दत्ता बोंढारे सातवर्षापासून सभापती आहे. नुकत्याच झालेल्या निवडणूकीत दत्ता बोंढारे व संजय बोंढारे यांनी आपली राजकीय ताकद दाखवून दिली आहे. आता पुन्हा दत्ता बोंढारे सभापती निश्चित आहे तर उपसभापती पद औंढा तालुक्यात दिले जाते की कळमनुरी तालुक्यात संधी दिली जाते तसेच मित्रपक्ष राष्ट्रवादी कॉग्रेसला संधी भेटते याकडे लक्ष वेधले गेले आहे. मागीलवेळी उपसभापती पद औंढा नागनाथ तालुक्याकडे होते. सदर तालुक्याने विजयात मताधिक्य देत मोठा हातभार लावला आहे.
