पांढरकवडा (Cricket Betting) : केळापुर तालुक्यातील विविध गावातील विद्यार्थी व सुशिक्षीत बेरोजगार युवकांना रोहयोचे काम देतो म्हणुन सुमारे २७ विद्यार्थी व युवकांचे पांढरकवडा येथील महाराष्ट्र बॅकेत खाते उघडुन त्यातुन क्रीकेट सट्ट्याच्या करोडो रुपयांची (Cricket Betting) हेराफेरी करण्यात आली होती. त्या प्रकरणात एलसिबीच्या पथकाने याआधी चार जणांना अटक केली होती. तर याच प्रकरणातील चंद्रपुर येथील सारंग साठवणे ३५ याला सुध्दा पोलीसांनी अटक केली असुन त्याला न्यायालयाने १४ ऑगस्ट पर्यत पिसीआर सुनावला आहे.
युवकांच्या खात्यातील करोडो रुपयांच्या ट्रान्झेक्शन प्रकरणी पांढरकवडा पोलीसांनी सर्वप्रथम श्रीकांत कर्लावार याच्या फिर्यादी वरुन मयुर राजेश चव्हाण २३ रा चोपन ता. केळापुर, मनोहर राठोड ४५ रा जरंग तालुका घाटंजी यांच्या विरुध्द विविध कलमान्वये गुन्हे दाखल केले होते. सदर प्रकरणाचा तपास एलसिबीकडे देण्यात आल्या नंतर एलसिबिच्या पथकाने १७ जुलै रोजी रात्री विविध गावातुन मयुर राजु चव्हाण २३ रा चोपन, उमेश अनिल आडे ३१ रा वसंतनगर, निखिल यादव खैरे ३० रा उमरी रोड, अलताफ मोहम्मद अनिस अकबाणी २३ रा तुकंदम तलाव चंद्रपुर यांना अटक केली होती. सद्या वरील सर्व आरोपी न्यायालयीन कोठडीत आहे. तालुक्यातील युवकांची बनावट बॅक खाते काढुन त्यातुन अवैद्य मार्गाने (Cricket Betting) क्रीकेट सट्ट्याच्या पैशाची हेराफेरी करण्यात आली होती.
सदर प्रकरणास रोहयोकडे वळविण्याचा काहींना प्रयत्न केला होता. मात्र सदर प्रकरण क्रीकेट सट्ट्याच्या पैशाचेच असल्याचे दैनिक देशोन्नतीने १० जुलै रोजीच्या अंकात वृत्त प्रकाशित करुन स्पष्ट केले होते. काही सटोडीयांनी पैसे घेवुन पसार झालेल्या मयुर चव्हाण यांच्याकडुन पैसे वसुली करण्याकरीता तालुक्यात बॉउंसर सुध्दा पाठविले होते. त्यानंतर या प्रकरणास वाचा फुटली होती. एलसिबीच्या पथकाने आज पर्यत या प्रकरणात एकुण पाच आरोपींना अटक केली आहे.
या प्रकरणातील आणखीनही मोठे मासे पोलीसांच्या गळाला लागलेले नाही. पोलीस कोठडीत असलेल्या सारंग साठवणेची चौकशी सुरु आहे. परंतु त्याने चौकशीमध्ये पुन्हा कोणकोणत्या आरोपींची नावे चौकशी अधिकार्‍यास सांगितली याची माहिती मिळु शकली नाही. संपुर्ण विदर्भभर जाळे पसरलेल्या क्रीकेट सट्ट्याच्या, पैशाच्या या हेराफेरीच्या (Cricket Betting) प्रकरणात पांढरकवडा येथील काही सटोडीयांचा सुध्दा सहभाग असल्याची चर्चा आहे. त्या दिशेने सुध्दा एलसिबीच्या पथकाने तपास करण्याची मागणी येथे होवु लागली आहे.
