माहूरसारख्या दुर्गम तालुक्यात नागरिकाभिमुख व पारदर्शक प्रशासनाची प्रभावी अंमलबजावणी केल्याबद्दल जिल्हास्तरीय सन्मान
माहूर (नांदेड) : आदिवासी, बंजारा बहुल तसेच दुर्गम आणि डोंगराळ भौगोलिक परिस्थिती असलेल्या माहूर तालुक्यात महसूल विभागाच्या माध्यमातून नागरिकांना जलद, पारदर्शक आणि प्रभावी प्रशासकीय सेवा उपलब्ध करून देत उत्कृष्ट कामगिरी बजावल्याबद्दल तहसीलदार अभिजित जगताप यांचा उत्कृष्ट तहसीलदार म्हणून दि. ६ रोजी महसूल दिनानिमित्त सन्मान करण्यात आला.
जिल्हाधिकारी राहुल कर्डीले यांच्या मार्गदर्शनाखाली आयोजित कार्यक्रमात अप्पर जिल्हाधिकारी रत्नदीप गायकवाड, पोलिस अधीक्षक निलाभ रोहण, मनपा आयुक्त महेश डोईफोडे, सहाय्यक जिल्हाधिकारी बि. श्रवण, निवासी उपजिल्हाधिकारी किरण अंबेकर, उपजिल्हाधिकारी प्रियंका पवार आदी मान्यवर उपस्थित होते.
माहूरसारख्या दुर्गम तालुक्यात गेल्या एका वर्षापासून कार्यरत असलेले तहसीलदार अभिजित जगताप यांनी महसूल विभागातील विविध कामकाजात गती आणत नागरिकाभिमुख प्रशासनाची प्रभावी अंमलबजावणी केली. विद्यार्थ्यांना शैक्षणिक प्रवेशासाठी आवश्यक असलेले विविध दाखले, नागरिकांना लागणारी उत्पन्न, जात, अधिवास, नॉन-क्रीमीलेअर आदी प्रमाणपत्रे तसेच शासनाच्या विविध योजनांशी संबंधित प्रशासकीय कामे शासनाने निश्चित करून दिलेल्या कालमर्यादेत पूर्ण करण्यावर त्यांनी विशेष भर दिला.
त्यांच्या कार्यकाळात नागरिकांना कार्यालयीन कामांसाठी वारंवार हेलपाटे मारावे लागू नयेत, यासाठी वेळेत सेवा देण्याबरोबरच महसूल विभागाच्या कामकाजात पारदर्शकता, शिस्त आणि उत्तरदायित्व जपण्यात आले. त्यांच्या उल्लेखनीय कार्याची दखल जिल्हा प्रशासनाने घेत महसूल दिनानिमित्त दि. ६ रोजी नांदेड येथील कै. शंकरराव चव्हाण सभागृहात आयोजित जिल्हास्तरीय कार्यक्रमात उत्कृष्ट तहसीलदार म्हणून अभिजित जगताप यांना पुरस्कार देऊन सन्मानित करण्यात आले.
