भद्रावती (चंद्रपूर) : शहरातील गजबजलेल्या भद्रनाग मंदिर चौकात आज, दि. २३ सप्टेंबर २०२६, बुधवारी सकाळी साडेसात वाजताच्या सुमारास, एका ४० वर्षीय युवकावर अज्ञात हल्लेखोरांनी धारदार शस्त्राने मानेवर वार करून निर्घृण हत्या केली. भरदिवसा घडलेल्या या थरारक घटनेने परिसरात एकच खळबळ उडाली असून मारेकरी घटनास्थळावरून पसार झाले आहेत.
मृतकाची ओळख उमदेव भाऊराव मेश्राम (वय ४०, रा. देऊरवाडा, हल्ली मु. शिवाजीनगर, प्रज्ञा वाचनालयाजवळ, भद्रावती) अशी झाली आहे.
प्राथमिक माहितीनुसार, उमदेव मेश्राम हे बुधवारी सकाळी सुमारे ७.३० वाजता घरून मोटारसायकलने कामानिमित्त निघाले होते. ते भद्रनाग मंदिर चौकात पोहोचताच दबा धरून बसलेल्या अज्ञात व्यक्तींनी त्यांच्यावर अचानक हल्ला चढवला. धारदार शस्त्राने मानेवर गंभीर वार झाल्याने ते कोसळले आणि जागीच त्यांचा मृत्यू झाला.
सकाळच्या वर्दळीच्या वेळीच ही घटना घडल्याने नागरिकांमध्ये भीतीचे वातावरण पसरले आहे. घटनेची माहिती मिळताच भद्रावती पोलिसांनी तातडीने घटनास्थळी धाव घेतली. उपविभागीय पोलीस अधिकारी सचिन खेत्रे यांच्या नेतृत्वाखाली पोलीस पथक घटनास्थळी दाखल झाले असून पंचनामा व घटनास्थळावरील पुरावे गोळा करण्याचे काम सुरू करण्यात आले आहे.
हल्लेखोर कोण होते? या हत्येमागील नेमके कारण काय? याचा कसून तपास पोलिसांकडून सुरू असून अज्ञात आरोपींचा शोध घेण्यासाठी पोलिसांनी तपासाची चक्रे वेगाने फिरवली आहेत. या थरारक हत्याकांडामुळे भद्रावती शहरात तणावाचे वातावरण असून पुढील पोलीस तपासाकडे सर्व नागरिकांचे लक्ष लागले आहे.
