गुजरातहून उच्च शिक्षणासाठी मुंबईत आले होते चार तरुण; एकाची प्रकृती चिंताजनक, नायर रुग्णालयात उपचार सुरू
मुंबई : मुंबईतील कोस्टल रोडवर रविवारी पहाटे घडलेल्या भीषण अपघातात तीन विद्यार्थ्यांचा मृत्यू झाला असून, एक जण गंभीर जखमी झाला आहे. गुजरातमधून मुंबईत उच्च शिक्षणासाठी आलेल्या चार तरुणांची भरधाव BMW कार पुलाचा कठडा तोडून तब्बल ५० फूट खाली कोसळली. लाला कॉलेजसमोर आणि लोटस जेट्टीजवळ हा अपघात झाला. धडकेनंतर कारचा पूर्णपणे चुराडा झाला.
प्राथमिक माहितीनुसार, रविवारी पहाटे साडेपाचच्या सुमारास ही BMW कार मरीन ड्राईव्हहून हाजी अलीच्या दिशेने जात होती. कोस्टल रोडवरील लाला कॉलेज आणि लोटस जेट्टी परिसरात कारचा वेग अधिक असल्याने चालकाचे नियंत्रण सुटले. त्यानंतर कार पुलाच्या कठड्यावर आदळून तो तोडत थेट खाली कोसळली.
मुंबई के कोस्टल रोड पर तेज रफ्तार BMW का भीषण हादसा, 3 लोगों की मौत और 1 गंभीर घायल।#MumbaiNews #CoastalRoad #RoadAccident #Mumbai pic.twitter.com/2Yf1o1ZoXY
— POLICE CHITRAPAT (@ChitrapatPolice) September 20, 2026
कार सिल्वासा पासिंगची; चारही तरुण अहमदाबादचे
अपघातग्रस्त BMW कार सिल्वासा, गुजरात पासिंगची असल्याचे तपासातून समोर आले आहे. कारमधील चारही तरुण अहमदाबादचे रहिवासी असून, ते मुंबईत उच्च शिक्षण घेण्यासाठी आले होते. मृत विद्यार्थ्यांपैकी एक आर्किटेक्चरचा, तर दुसरा इंजिनिअरिंगचा विद्यार्थी असल्याची माहिती समोर आली आहे.
तीन जणांचा मृत्यू, एकावर उपचार सुरू
अपघाताची माहिती मिळताच कोस्टल रोड कंट्रोल रूम आणि पोलिसांचे पथक घटनास्थळी दाखल झाले. कारमधील जखमींना तातडीने नायर रुग्णालयात हलवण्यात आले.
नायर रुग्णालयाच्या मुख्य वैद्यकीय अधिकाऱ्यांनी दिलेल्या माहितीनुसार, शानय गज्जल (वय २१), धिर्या सेठ (वय १७) आणि आणखी एका तरुणाचा मृत्यू झाला आहे. तर चौथा तरुण गंभीर जखमी असून त्याच्यावर रुग्णालयातील ट्रॉमा वॉर्डमध्ये उपचार सुरू आहेत.
कुटुंबीयांना माहिती; पोलिसांचा तपास सुरू
अपघातानंतर पोलिसांनी घटनास्थळी पंचनामा केला असून मृत आणि जखमी विद्यार्थ्यांच्या गुजरातमधील कुटुंबीयांना दुर्घटनेची माहिती देण्यात आली आहे. प्राथमिक तपासात कार अतिवेगात असल्याने चालकाचे नियंत्रण सुटल्याचा अंदाज व्यक्त करण्यात आला आहे. या अपघातामागील नेमकी परिस्थिती आणि इतर बाबींचा पोलीस अधिक तपास करत आहेत.
