नांदेड (CBI Investigation) : नीट पेपरफुटी प्रकरणात सीबीआयने पेपर कसा फुटला याची चौकशी करताना अनेक क्लासेस आणि खाजगी इसमांची चौकशी केली आहे. या प्रकरणात प्राध्यापक कुलकर्णी यांना सीबीआयने ताब्यात घेतले होते. त्यानंतर आता सीबीआयने आपला मोर्चा थेट पालकांकडे वळवल्याचे दिसत आहे.
फुटलेला पेपर ज्यांनी विकत घेतला, अशांची माहिती सीबीआयकडे प्राप्त झाल्याचा अंदाज व्यक्त केला जात आहे. याच अनुषंगाने सीबीआयने नांदेडमधील विद्युतनगर येथील कदम यांच्याकडे चौकशी केली आहे. कदम यांनी एकूण पाच लाख रुपये देऊन हा पेपर खरेदी केल्याची माहिती समोर आली आहे.
या प्रकरणात अद्याप कुणालाही अटक करण्यात आलेली नाही. चौकशी पूर्ण झाल्यानंतर सीबीआयचे पथक परत गेले. या कारवाईमुळे मात्र संबंधितांमध्ये मोठी खळबळ उडाली असून अनेकांचे धाबे दणाणले आहेत.
