96.35% गुणांसह सेजल जेसवानी वाणिज्य शाखेत पहिली
हिंगणघाट (Commerce Topper) : बारावी परीक्षेचा निकाल शनिवारी जाहीर झाला असून, हिंगणघाट येथील सेजल सुनील जेसवानी हिने वाणिज्य शाखेत 96.35 टक्के गुण मिळवत वर्धा जिल्ह्यात प्रथम क्रमांक पटकावला आहे. तिच्या या उल्लेखनीय यशामुळे हिंगणघाट शहराचा गौरव वाढला आहे.
सेजल ही येथील होली फेथ ज्युनिअर कॉलेजची विद्यार्थिनी असून जेसवानी कुटुंबातील तीन मुलींमध्ये सर्वात लहान आहे. तिचे वडील सुनील जेसवानी हे हार्डवेअर व्यवसायिक असून आई ज्योती जेसवानी या गृहिणी आहेत. मोठी बहीण मेघा ही सीए अभ्यासक्रम करत आहे, तर यशस्विनी ही बीडीएसच्या तिसऱ्या वर्षात शिक्षण घेत आहे.
सेजलने एकूण 600 पैकी 578 गुण मिळवले आहेत. विषयानुसार तिचे गुण पुढीलप्रमाणे – मॅथ्स व स्टॅटिस्टिक्स 99, ओसीएम 97, इकॉनॉमिक्स 97, बुक-कीपिंग व अकाउंटन्सी 97, इन्फॉर्मेशन टेक्नॉलॉजी 96.
दररोज सुमारे चार तास अभ्यास करून सेजलने हे यश संपादन केले. तिच्या यशामागे आई ज्योती तसेच बहिणी मेघा व यशस्विनी यांचे मोलाचे मार्गदर्शन लाभले. याशिवाय कनिष्ठ महाविद्यालयाच्या प्राचार्या बिना मॅडम आणि अमित दीक्षित सर यांचेही तिला मार्गदर्शन मिळाले. भविष्यात सीएमए (कॉस्ट अँड मॅनेजमेंट अकाउंटंट) हा अभ्यासक्रम करण्याचा तिचा मानस असून पुढील शिक्षणासाठी ती मुंबई येथे जाणार असल्याचे तिने सांगितले. पेंटिंग, ड्रॉइंग आणि जिम यामध्येही तिला विशेष आवड आहे. दहावीमध्ये 90.80% गुण मिळवलेल्या सेजलने बारावीत आणखी उज्वल यश संपादन करत वाणिज्य शाखेत जिल्ह्यात अव्वल स्थान मिळवले आहे.
