पिंगळगड नाल्याजवळ अपघात; एक जण गंभीर जखमी, कंटेनर चालकाविरुद्ध गुन्हा
परभणी (Container Crash) : भरधाव कंटेनर चालकाने अचानक ब्रेक मारल्याने मागून येणारी दुचाकी कंटेनरवर आदळून झालेल्या भीषण अपघातात एका ३० वर्षीय तरुणाचा मृत्यू झाला, तर एक जण गंभीर जखमी झाला. ही घटना रविवार, २१ जून रोजी दुपारच्या सुमारास परभणी शहरातील गंगाखेड रोडवरील पिंगळगड नाल्याजवळ घडली.
याप्रकरणी मळीबा दौलतराव चव्हाण यांनी तक्रार दिली असून, कंटेनर क्रमांक एमएच ४० बीएल ८२९० च्या चालकाविरुद्ध कोतवाली पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, संबंधित कंटेनर चालकाने त्याच्या ताब्यातील वाहन हयगयीने व निष्काळजीपणे चालवत अचानक ब्रेक लावला. त्यामुळे मागून येत असलेली सर्जेराव मळीबा चव्हाण (वय ३०, रा. सोन्ना) यांची दुचाकी कंटेनरवर जाऊन जोरात धडकली.
या अपघातात सर्जेराव चव्हाण गंभीर जखमी झाले. उपचारादरम्यान त्यांचा मृत्यू झाला. तसेच फिर्यादी मळीबा चव्हाण हे गंभीर जखमी झाले असून, अपघातात दुचाकीचेही मोठे नुकसान झाले आहे.
अपघातानंतर कंटेनर चालक वाहन घटनास्थळी सोडून फरार झाला. या प्रकरणी कोतवाली पोलीस ठाण्यात गुन्हा दाखल करण्यात आला असून, पुढील तपास सहाय्यक पोलीस उपनिरीक्षक शेख गौस करीत आहेत.
