पोलिसांनी तपासाची चक्रे फिरवत व्यापाऱ्याला सुखरूप आणले; चार लाखांचा मुद्देमाल लुटला
परभणी : परभणीतील पाथरी शहरातील मोंढा परिसरातून कापूस व्यापारी पुरुषोत्तम सोमाणी यांचे शुक्रवारी दुपारी अपहरण करण्यात आले. याप्रकरणी पाथरी पोलिसांत गुन्हा नोंद करण्यात आला असून, अपहरणकर्त्यांच्या तावडीतून व्यापाऱ्याची सुखरूप सुटका करण्यात आली आहे. या प्रकरणात ४ लाखांचा मुद्देमाल लुटण्यात आला. पोलिसांनी एका आरोपीला ताब्यात घेतले असल्याची माहिती पोनि. लक्ष्मण केंद्रे यांनी दिली.
पुरुषोत्तम गंगाभिषण सोमाणी हे शुक्रवारी दुपारी सोने गहाण ठेवण्यासाठी जात होते. यावेळी एका पांढऱ्या रंगाच्या कारमधून त्यांना बळजबरीने उचलून नेण्यात आले. लोहा येथे नेऊन त्यांच्या जवळील २२ हजार रुपये, सोन्याच्या अंगठ्या असा ४ लाख २ हजार रुपयांचा मुद्देमाल बळजबरीने काढून घेण्यात आला.
आणखी पैसे देण्यासाठी धमकावत सोमाणी यांच्या पत्नीला फोन करून आरोपीच्या फोन-पे खात्यावर ९० हजार रुपये जमा करण्यास भाग पाडल्याचे तक्रारीत नमूद आहे. तसेच आणखी २ लाख ६० हजार रुपये दे, अन्यथा तुला खतम करू, अशा धमकीचा उल्लेखही तक्रारीत आहे.
या प्रकरणात रंगनाथ भुरे, महादू महागावकर, दोघे रा. लोहा, जि. नांदेड, यांच्यासह दोन अनोळखी व्यक्तींवर पाथरी पोलिसांत गुन्हा नोंद झाला आहे. तपास पोउपनि. गणेश पवार करत आहेत.
अपहरण झालेल्या पुरुषोत्तम सोमाणी यांना पोखर्णी फाटा, गंगाखेड येथून सुखरूप आणण्यात आले. या प्रकरणातील एका आरोपीला पोलिसांनी ताब्यात घेतले असून पुढील तपास सुरू आहे.
