विद्यार्थी एकताकडून पोलीस प्रशासनाकडे परवानगीसाठी निवेदन सादर!
मानोरा (Sonam Wangchung Support) : दिल्लीतील जंतर मंतर येथे सुरू असलेल्या सोनम वांगचुंग यांच्या उपोषणाला पाठिंबा देण्यासाठी 'विद्यार्थी एकता' या संघटनेच्या वतीने दि. २० जुलै २०२६ रोजी सोमवारला मानोरा येथे शांततापूर्ण समर्थन रॅलीचे आयोजन करण्यात आले आहे. या रॅलीसाठी परवानगी व ध्वनीक्षेपक वापरण्याबाबत संघटनेने मानोरा पोलीस स्टेशनच्या ठाणेदार नैना पोहेकर यांचेकडे दि. १७ जुलै रोजी निवेदन सादर केले आहे.
निवेदनानुसार सोमवार दिनांक २० जुलै २०२६ रोजी सकाळी ११ वाजता रॅली पंचायत समिती पासून ते तहसिल पर्यंत निघणार आहे. सदर रॅली दरम्यान जनजागृतीसाठी घोषणा व सूचना देण्याच्या उद्देशाने ध्वनीक्षेपक अर्थात साऊंड सिस्टीम वापरण्यात येणार आहे. त्यासाठी आवश्यक ती परवानगी द्यावी अशी विनंती निवेदनात करण्यात आली आहे. ध्वनीक्षेपकाचा वापर शासनाच्या नियमांचे व पोलीस प्रशासनाच्या सूचनांचे पूर्णपणे पालन करून करण्यात येईल. सार्वजनिक शांतता, कायदा व सुव्यवस्था अबाधित राहील याची पूर्ण काळजी घेतली जाईल. निवेदनावर विजय पाटील, प्रकाश राठोड, सुनील राठोड, गोपाल चव्हाण, श्याम पवार, गजानन सोनटक्के, मस्तोविन शेख, प्रफुल इंगोले, सुशांत खडसे, अक्षय अंधारे, आवेश समितीया, किसन वायले, चेतन पवार, नितीन चगदल, महेश राठोड आदी कार्यकर्त्यांच्या स्वाक्षऱ्या आहेत.
दिल्लीतील आंदोलनाला स्थानिक पातळीवर पाठिंबा दर्शवण्यासाठी होत असलेल्या या रॅलीकडे आता तालुक्याचे लक्ष लागले आहे.
