नागपूरच्या रामगिरी बंगल्यावर चंद्रशेखर बावनकुळे यांच्यासोबत बंद दाराआड चर्चा; दुष्काळ, शेतकरी प्रश्न आणि मनोज जरांगे यांच्या उपोषणावर चर्चा झाल्याची शक्यता
नागपूर : मुख्यमंत्री देवेंद्र फडणवीस आज नागपूरहून थेट दिल्लीला रवाना होणार असून त्यांच्या अचानक ठरलेल्या दिल्ली दौऱ्यामुळे महाराष्ट्राच्या राजकीय वर्तुळात चर्चांना वेग आला आहे. दिल्लीला जाण्यापूर्वी महसूलमंत्री चंद्रशेखर बावनकुळे यांनी मुख्यमंत्री फडणवीस यांची भेट घेतली. नागपूर येथील रामगिरी बंगल्यावर दोन्ही नेत्यांमध्ये बंद दाराआड बैठक झाल्याची माहिती आहे.
मुख्यमंत्र्यांचा हा दिल्ली दौरा नेमका कोणत्या कारणासाठी आहे, याबाबत अधिकृत माहिती अद्याप समोर आलेली नाही. मात्र, दिल्लीमध्ये भाजपच्या काही वरिष्ठ नेत्यांची फडणवीस भेट घेण्याची शक्यता व्यक्त केली जात आहे. त्यामुळे या दौऱ्याला राजकीयदृष्ट्या विशेष महत्त्व प्राप्त झाले आहे.
फडणवीस आणि बावनकुळे यांच्या भेटीत राज्यातील विविध महत्त्वाच्या प्रश्नांवर चर्चा झाल्याची शक्यता आहे. राज्यातील दुष्काळी परिस्थिती, शेतकऱ्यांचे प्रश्न तसेच मनोज जरांगे यांच्या उपोषणाच्या पार्श्वभूमीवर निर्माण झालेली परिस्थिती यासंदर्भात दोन्ही नेत्यांमध्ये चर्चा झाल्याचे बोलले जात आहे. मात्र, बैठकीतील चर्चेचा अधिकृत तपशील अद्याप समोर आलेला नाही.
दरम्यान, दिल्लीला रवाना होण्यापूर्वी मुख्यमंत्री फडणवीस यांनी नागपूर न्यायालयातील पदग्रहण कार्यक्रमाला हजेरी लावली. यावेळी त्यांनी माध्यमांशी संवाद साधताना नागपूर न्यायालयातील सुविधांबाबत भाष्य केले.
न्यायालयाच्या नव्या टीमचे स्वागत करताना फडणवीस यांनी मागील टीमने केलेल्या कामाचे कौतुक केले. जुन्या टीमच्या मागणीनुसार इमारतीचे काम पूर्ण झाल्याचे त्यांनी सांगितले. नव्या टीमने नवीन न्यायालयाची मागणी केली असून नागपूर हे महत्त्वाचे ठिकाण असल्याने ही गरज पूर्ण होणे आवश्यक असल्याचे मुख्यमंत्री म्हणाले. जुन्या न्यायालयातील जागा अपुरी पडत असल्याने नवीन न्यायालयाची मागणी योग्य असल्याचेही त्यांनी स्पष्ट केले.
माजी सरन्यायाधीश गवई यांचा उल्लेख करताना मुख्यमंत्री म्हणाले की, आता आपण माजी झाल्यामुळे केवळ विनंती करू शकतो. मात्र, त्यांनी केलेली मागणी ही सरन्यायाधीशांची मागणी म्हणून गांभीर्याने घेतली जावी, असेही त्यांनी नमूद केले.
न्यायालयीन व्यवस्थेतील निवडणुकीच्या प्रक्रियेबाबतही फडणवीस यांनी मिश्कील टिप्पणी केली. किलोर यांनी निवडणूक लढवताना येणाऱ्या अडचणींचा उल्लेख केल्याचे सांगत, दर पाच वर्षांनी निवडणुकीच्या काळात कोणत्या प्रकारच्या अडचणींना सामोरे जावे लागते, याची जाणीव असल्याचे त्यांनी म्हटले.
न्यायालयीन प्रक्रियेत सातत्याने सुधारणा होत असून भविष्यात आणखी बदल अपेक्षित असल्याचेही मुख्यमंत्री म्हणाले. नव्या टीमच्या पदग्रहण सोहळ्याला माजी सरन्यायाधीश उपस्थित राहिल्याचा उल्लेख करत, त्यातून न्यायव्यवस्थेचे महत्त्व अधोरेखित होत असल्याचे त्यांनी सांगितले.
गवई यांच्याकडून अनेक गोष्टी शिकण्यासारख्या असल्याचे नमूद करत फडणवीस यांनी न्यायव्यवस्थेतील कामकाजाबाबतही भाष्य केले. राजकीय व्यवस्थेतील विरोधी पक्षनेत्याप्रमाणे न्यायालयीन व्यवस्थेत अशी भूमिका नसावी, अशी अपेक्षाही त्यांनी व्यक्त केली.
मुख्यमंत्री फडणवीस यांच्या अचानक दिल्ली दौऱ्याच्या पार्श्वभूमीवर राज्यातील राजकीय घडामोडींना आता वेग येण्याची शक्यता व्यक्त केली जात असून दिल्लीतील वरिष्ठ नेत्यांसोबत होणाऱ्या संभाव्य भेटींवर राजकीय वर्तुळाचे लक्ष लागले आहे.
