रिसोड (Risod Karda Society) : रिसोड तालुक्यातील सेवा सहकारी संस्था मर्या. करडा येथे संस्थेच्या अध्यक्षपदी डॉ. धीरज वामनराव देशमुख, तर उपाध्यक्षपदी शामभाऊ नारायणराव देशमुख यांची अविरोध निवड करण्यात आली. दि. १० ऑगस्ट २०२६ रोजी करडा येथील सेवा सहकारी संस्थेच्या कार्यालयात संस्थेच्या पदाधिकारी निवडीसाठी सभा आयोजित करण्यात आली होती. सदर सभेसाठी पी. आर. वाडेकर, सहकार अधिकारी, देऊळगाव राजा हे निवडणूक निर्णय अधिकारी म्हणून उपस्थित होते.
अध्यक्षपदासाठी गंभीरराव देशमुख यांनी डॉ. धीरज देशमुख यांच्या नावाचा प्रस्ताव मांडला, तर उपाध्यक्षपदासाठी गजाननराव देशमुख यांनी शामभाऊ देशमुख यांच्या नावाचा प्रस्ताव मांडला. दोन्ही पदांसाठी प्रत्येकी एकच अर्ज प्राप्त झाल्याने निवडणूक निर्णय अधिकारी पी. आर. वाडेकर यांनी डॉ. धीरज देशमुख यांची अध्यक्षपदी, तर शामभाऊ देशमुख यांची उपाध्यक्षपदी अविरोध निवड झाल्याचे घोषित केले.
या (Risod Karda Society) निवडणूक सभेस गंभीरराव देशमुख, गजानन देशमुख, झनकराव देशमुख,प्रभाकर देशमुख, भाऊराव देशमुख, भुजंगराव देशमुख, कैलासराव देशमुख, रमेशराव धांडे, लक्ष्मण कुरवाडे, सौ. मुक्ताबाई अंकुशराव देशमुख आणि श्रीमती पुष्पाबाई चिंतागराव देशमुख यांच्यासह संस्थेचे सदस्य उपस्थित होते. अकोला व वाशिम जिल्हा मध्यवर्ती सहकारी बँकेचे युवा संचालक डॉ. धिरजकुमार देशमुख यांची सलग चौथ्यांदा सेवा सहकारी संस्थेच्या अध्यक्षपदी निवड झाली. निवडीनंतर जिल्हा मध्यवर्ती बँकेचे माजी उपाध्यक्ष वामनरावजी देशमुख यांच्या हस्ते नवनिर्वाचित अध्यक्ष, उपाध्यक्ष तसेच उपस्थित सर्व सदस्यांचा सत्कार करण्यात आला. यावेळी उपस्थितांनी नवनिर्वाचित पदाधिकाऱ्यांचे अभिनंदन करून पुढील कार्यकाळासाठी शुभेच्छा दिल्या.
याप्रसंगी संस्थेच्या कामकाजात भास्करराव मोरे, सहायक अधिकारी, तसेच सुरेशराव देशमुख, संस्थेचे गटसचिव आणि भानुदास धांडे यांनी मोलाचे सहकार्य केले. यावेळी नवनिर्वाचित अध्यक्ष डॉ. धीरज देशमुख यांनी, “संस्थेच्या कार्यक्षेत्रातील कोणताही पात्र शेतकरी कर्जापासून वंचित राहणार नाही, यासाठी आपण सर्वतोपरी प्रयत्न करू,” अशी ग्वाही दिली.
