देवरी/गोंदिया (Devarat unseasonal rain) : मागील दोन दिवसांपासून देवरीसह तालुक्याला अवकाळी पाऊस व वादळाचा चांगलाच तडाखा बसत आहे. तालुक्यात आज (ता.९) सायंकाळी हवामानात अचानक बदल होऊन अवकाळी पावसाने रौद्र रूप धारण केले. सायंकाळी ५:३० वाजेच्या सुमारास सोसाट्याचा वारा आणि विजांच्या कडकडाटासह मुसळधार पाऊस सुरू झाला. पावसासोबतच मोठ्या प्रमाणात गारपीट झाल्याने परिसरात एकच तारांबळ उडाली. या वादळी वार्‍यामुळे अनेक ठिकाणी जुनी झाडे उन्मळून पडल्याने वाहतूक ठप्प झाली होती. तर काही भागांतील वीज पुरवठाही खंडित झाला आहे.
मागील दोन ते तीन दिवसांपासून सायंकाळ होताच वातावरण निर्मिती होत आहे. (Devarat unseasonal rain) वादळ व अवकाळी पाऊस हजेरी लावत असल्याने नागरिकांची चांगलीच तारांबळ उडाली आहे. दिवसभर जाणवणार्‍या प्रचंड उकाड्यानंतर आलेल्या या पावसामुळे नागरिकांना उष्णतेपासून दिलासा मिळाला असला, तरी शेतकर्‍यांच्या चिंतेत मोठी भर पडली आहे. सध्या रब्बी हंगामातील पिकांची काढणी आणि तेंदूपत्ता संकलनाचे काम सुरू असतानाच या पावसाने हजेरी लावल्याने पिकांचे मोठे नुकसान होण्याची शक्यता निर्माण झाली आहे. विशेषतः आंबा आणि इतर फळबागांना या गारपिटीचा मोठा फटका बसला असून प्राथमिक अंदाजानुसार बागायतदारांचे अतोनात नुकसान झाले आहे.
शहरासह ग्रामीण भागातही झाडे पडल्याने घरांचे आणि विजेच्या खांबांचे नुकसान झाले आहे. अचानक आलेल्या या नैसर्गिक आपत्तीमुळे नागरिकांची मोठी धावपळ उडाली. प्रशासनाने या परिस्थितीची दखल घेतली असून, नागरिकांनी सुरक्षित ठिकाणी आश्रय घ्यावा आणि झाडांखाली उभे राहू नये, असे आवाहन केले आहे. महसूल विभागाने नुकसानीचे पंचनामे लवकरात लवकर करावेत, अशी मागणी आता बाधित शेतकर्‍यांकडून केली जात आहे.
अर्जुनी मोरगाव व आमगावात पावसाची हजेरी
जिल्ह्यावर अवकाळी पावसाचे (Devarat unseasonal rain) संकट कायम आहे. मागील चार ते पाच दिवसांपासून सतत पाऊस व वादळ हजेरी लावत आहे. त्यातच आज, अर्जुनी मोरगाव व आमगाव तालुक्यातही वादळी वार्‍यासह विजांचा कडकडाट सुरू झाला. आणि रिमझिम पावसाला सुरुवात झाली. मागील दोन दिवसांपासून वादळाचा तडाखा बसत असल्याने नागरिकांसह शेतकरी चिंतेत सापडले आहेत.
