डायल ११२ वर खोटी माहिती देणाऱ्या इसमावर गुन्हा दाखल

चान्नी (Dial 112) : आपत्कालीन सेवा डायल ११२ वर खोटी माहिती देऊन पोलीस यंत्रणेला त्रास देणाऱ्या इसमाविरुद्ध गुन्हा दाखल करण्यात आला आहे. सदर प्रकरणाबाबत मिळालेल्या माहितीनुसार, दि. ०९ मे २०२६ रोजी एका व्यक्तीने डायल ११२ वर कॉल करून आपल्या भाचीवर गावातील काही मुलांनी लैंगिक अत्याचार करण्याचा प्रयत्न केल्याची माहिती दिली. या गंभीर माहितीची दखल घेत पोलीसांनी तात्काळ घटनास्थळी धाव घेतली व चौकशी सुरू केली.

घटनास्थळी भेट देऊन संबंधित व्यक्तींची विचारपूस व बयाण नोंदविण्यात आले. मात्र तपासाअंती सदर माहिती पूर्णपणे खोटी असल्याचे निष्पन्न झाले. याप्रकरणी गणेशा महादेव झाटे (वय २५ वर्ष) याच्याविरुद्ध पोलीसांना जाणीवपूर्वक त्रास देण्याच्या उद्देशाने खोटी माहिती दिल्याप्रकरणी बीएनएस अधिनियमाच्या कलम १७७ अन्वये चान्नी पोलीस ठाण्यात गुन्हा नोंद करण्यात आला आहे. हा गुन्हा ठाणेदार यांच्या आदेशानुसार दाखल करण्यात आला आहे.

दरम्यान, पोलीस प्रशासनाने नागरिकांना आवाहन केले आहे की, कोणत्याही प्रकारे खोटी माहिती देऊन आपत्कालीन सेवांचा गैरवापर करू नये. अशा कृत्यांमुळे पोलीस यंत्रणेचा वेळ व संसाधने वाया जातात आणि खरी गरज असलेल्या नागरिकांना मदत मिळण्यात विलंब होऊ शकतो.