500 रुपयांच्या 194 बनावट नोटा जप्त; डोणगावपर्यंत पोहोचले तपासाचे धागेदोरे, रॅकेटमागील सूत्रधारांचा शोध सुरू
अकोला : अकोल्यातील स्थानिक गुन्हे शाखेने बनावट भारतीय चलनी नोटांच्या अवैध रॅकेटवर मोठी कारवाई करत तीन आरोपींना अटक केली आहे. या कारवाईदरम्यान 500 रुपयांच्या एकूण 194 बनावट नोटा, म्हणजेच 97 हजार रुपयांच्या नकली चलनी नोटा जप्त करण्यात आल्या असून, या प्रकरणाचा तपास आता अधिक व्यापक करण्यात आला आहे.
17 जुलै रोजी स्थानिक गुन्हे शाखेचे पोलीस निरीक्षक नितीन लेव्हरकर यांना गोपनीय माहिती मिळाली होती की, गुडधी येथील चंदन भिमराव घांडोरे हा बनावट नोटा खऱ्या चलनी नोटांप्रमाणे बाजारात वापरण्याच्या तयारीत आहे. ही माहिती तत्काळ पोलीस अधीक्षक अर्चित चांडक यांना देण्यात आली. त्यांच्या मार्गदर्शनाखाली विशेष पथकाची स्थापना करून कारवाईचे नियोजन करण्यात आले.
यानंतर स्थानिक गुन्हे शाखेच्या पथकाने गुडधी परिसरातील आलीयाबाद रोड येथे सापळा रचून चंदन घांडोरे याला ताब्यात घेतले. त्याची झडती घेतली असता 500 रुपयांच्या 21 बनावट नोटा आढळून आल्या. पंचांसमक्ष तपासणी केल्यानंतर त्या भारतीय चलनातील बनावट नोटा असल्याचे स्पष्ट झाले.
चौकशीतून उलगडले संपूर्ण रॅकेट
प्राथमिक चौकशीत चंदन घांडोरे याने या बनावट नोटा मुर्तीजापूर येथील जहीरोद्दीन जबिरोद्दीन याच्याकडून मिळाल्याची कबुली दिली. त्यानंतर स्थानिक गुन्हे शाखेचे पथक तातडीने मुर्तीजापूरला रवाना झाले. आसरा फाटा परिसरात सापळा रचून जहीरोद्दीनला ताब्यात घेण्यात आले. त्याच्या ताब्यातून 500 रुपयांच्या 173 बनावट नोटा जप्त करण्यात आल्या.
पुढील चौकशीत जहीरोद्दीनने या नोटा गुडधी येथील विठ्ठल संजय वारोकार याच्याकडून घेतल्याची माहिती दिली. त्यानुसार पोलिसांनी विठ्ठल वारोकार यालाही ताब्यात घेतले. त्याच्या चौकशीत डोणगाव, जिल्हा बुलडाणा येथील एका व्यक्तीकडून या बनावट नोटा आणल्याची माहिती समोर आली. आरोपी या नोटा बाजारात खऱ्या चलनी नोटांप्रमाणे वापरण्याच्या प्रयत्नात असल्याचे तपासात निष्पन्न झाले आहे.
बनावट नोटा कुठे छापल्या? तपास सुरू
या प्रकरणी चंदन भिमराव घांडोरे, जहीरोद्दीन जबिरोद्दीन आणि विठ्ठल संजय वारोकार या तिघांविरुद्ध सिव्हिल लाईन पोलीस ठाण्यात भारतीय न्याय संहितेच्या कलम 180 आणि 3(5) अन्वये गुन्हा दाखल करण्यात आला आहे.
या रॅकेटमध्ये आणखी कोणाचा सहभाग आहे, बनावट नोटा नेमक्या कुठे छापल्या जात होत्या तसेच त्या राज्यातील इतर भागातही पुरवल्या गेल्या होत्या का, याचा आता पोलीस सखोल तपास करत आहेत.
ही संपूर्ण कारवाई पोलीस अधीक्षक अर्चित चांडक, अपर पोलीस अधीक्षक बी. चंद्रकांत रेड्डी यांच्या मार्गदर्शनाखाली पोलीस निरीक्षक नितीन लेव्हरकर आणि स्थानिक गुन्हे शाखेच्या पथकाने केली. या धडक कारवाईमुळे बनावट चलनी नोटांच्या अवैध रॅकेटला मोठा धक्का बसला असून आर्थिक फसवणुकीचा मोठा प्रकार उघडकीस आणण्यात पोलिसांना यश आले आहे.
