कळमनुरी (Fake Fertilizer) : खरीप हंगाम तोंडावर असतानाच बोगस खत विक्रीचे रॅकेट उघडकीस आणत कृषी विभागाने शनिवारी कळमनुरी तालुक्यातील मसोड येथे मोठी कारवाई केली. राजस्थानमधून आलेल्या एका ट्रकमध्ये सुमारे दीड लाख रुपये किमतीचे ६९० जिप्सम खताचे पोते जप्त करण्यात आले.
जिल्हाधिकारी राहुल गुप्ता व मुख्य कार्यकारी अधिकारी विवेक गायकवाड यांनी बोगस निविष्ठा विक्री रोखण्यासाठी दिलेल्या सक्त सूचनांनंतर कृषी विभाग अ‍ॅक्शन मोडवर आला होता. पोलीस अधीक्षक निलाभ रोहन यांनीही तातडीने पोलीस मदत देण्याचे आदेश दिले होते.
शनिवारी दुपारी मसोड येथे ट्रकमधून थेट शेतकऱ्यांना जिप्समची विक्री सुरू असल्याची गुप्त माहिती कृषी विकास अधिकारी अतुल वायसे यांना मिळाली. त्यांनी कृषी अधिकारी पंकज राठोड यांच्या पथकासह तत्काळ घटनास्थळ गाठले. ट्रकची तपासणी केली असता आत जिप्समचा मोठा साठा आढळून आला.
घटनेचे गांभीर्य लक्षात घेऊन पोलीस निरीक्षक प्रेमकुमार माकोडे व सहाय्यक पोलीस निरीक्षक रघुनाथ शेवाळे यांच्या पथकाला पाचारण करण्यात आले. पोलिसांनी ट्रकसह सर्व ६९० पोती जप्त करून कळमनुरी पोलीस ठाण्यात जमा केली आहेत.
जिप्सम हे अधिकृत खत नसून त्याच्या नावाखाली शेतकऱ्यांची दिशाभूल करून आर्थिक फसवणूक केली जाते. वेळीच झालेल्या या कारवाईमुळे शेकडो शेतकऱ्यांचे नुकसान टळले आहे.
या प्रकरणी कळमनुरी पोलीस ठाण्यात गुन्हा दाखल करण्याची प्रक्रिया सुरू असून जिल्ह्यात बोगस खते व बियाणे विक्री करणाऱ्यांवर करडी नजर ठेवली जाणार असल्याचे कृषी विभागाने स्पष्ट केले.
