एकावर औंढा नागनाथ पोलीस ठाण्यात फसवणुकीचा गुन्हा दाखल
औंढा नागनाथ (Fake Number Plate) : वाहतूक दंड टाळण्यासाठी दुसऱ्या कारचा नोंदणी क्रमांक स्वतःच्या कारवर लावून वापरणे एका कारचालकाला चांगलेच महागात पडले. दोन्ही वाहनांचा एकच नोंदणी क्रमांक आढळून आल्याने बनावट नंबर प्लेट वापरणाऱ्या असोला येथील एका व्यक्तीविरुद्ध २६ जून रोजी औंढा नागनाथ पोलीस ठाण्यात फसवणुकीचा गुन्हा दाखल करण्यात आला आहे.
पोलिसांनी दिलेल्या माहितीनुसार, असोला येथील प्रमोद मुरलीधर कपाटे यांनी आदिनाथ रंगनाथ काळे (रा. आजरसोंडा) यांच्या मालकीच्या स्विफ्ट डिझायर (एमएच १२ क्यूजी ६३१०) या वाहनाचा नोंदणी क्रमांक स्वतःच्या स्विफ्ट डिझायर कारवर लावला होता. स्वतःच्या वाहनावर वाहतूक दंड लागू नये, स्वतःचा फायदा व्हावा तसेच शासनाची फसवणूक व्हावी या उद्देशाने त्यांनी हा प्रकार केल्याचा आरोप आहे.
दरम्यान, नांदेड येथे संबंधित वाहनावर वाहतूक दंड आकारण्यात आला. मात्र तो दंड आदिनाथ काळे यांच्या वाहनावर नोंद झाला. त्यावेळी त्यांचे वाहन पुण्यात असल्याने त्यांनी याबाबत चौकशी केली असता त्यांच्या वाहनाचा क्रमांक दुसऱ्या कारवर वापरला जात असल्याचे समोर आले.
यानंतर त्यांनी औंढा नागनाथ पोलीस ठाण्यात तक्रार दिली. पोलीस निरीक्षक शामकुमार डोंगरे व वाहतूक पोलीस वसंत चव्हाण यांनी तपास करून असोला येथे संबंधित कार शोधून काढली. दोन्ही वाहने ताब्यात घेऊन जप्त करण्यात आली.
वाहतूक पोलीस वसंत चव्हाण यांच्या फिर्यादीवरून प्रमोद मुरलीधर कपाटे (रा. असोला, ता. औंढा नागनाथ) यांच्याविरुद्ध फसवणुकीचा गुन्हा दाखल करण्यात आला असून पुढील तपास सुरू आहे.
